Mahayuti Government Formation: मुख्यमंत्री शपथविधीची तारीख ठरली! नरेंद्र मोदींसह अनेक मान्यवर उपस्थित राहणार

Mumbai News : विधानसभेच्या निकाल लागून आज सात दिवस झाली, पण अद्यापही मुख्यमंत्रि कोण विराजमान होणार, हे ठरलेले नाही. येत्या दोन दिवसात महायुतीकडून मुख्यमंत्रिपदाचे नाव जाहीर करण्यात येणार आहे. मुख्यमंत्र्यांचे नाव गुलदस्तात असले तरी शपथविधीची तारीख ठरली असल्याचे माहिती आहे.

6 डिसेंबर हा महामानव डॉ. बाबासाहेब आंबेडकर यांचा महापरिनिर्वाण दिन आहे. यात दिवशी महाराष्ट्रात मुख्यमंत्रिपदाचा शपथविधी सोहळा होणार असल्याचे वृत्त साम टिव्हीने दिले आहे.संविधान समोर ठेऊन शपथविधी होईल, अशी माहिती विश्वसनीय सुत्रांनी दिली. सुरक्षेच्या कारणामुळे हा शपथविधी सोहळा बीकेसीमध्ये होणार असल्याचे समजते. पंतप्रधान नरेंद्र मोदी यांच्यासह भाजपशासित राज्याचे मुख्यमंत्री उपस्थित राहणार आहेत.

गुरुवारी रात्री अमित शाह यांच्यासोबत एकनाथ शिंदे, अजित पवार, देवेंद्र फडणवीस यांची अडीच तास बैठक झाली. यात खातेवाटपाबाबत सविस्तर चर्चा झाली. मुख्यमंत्रीपदासोबत गृहमंत्री पद मिळावे, असा आग्रह भाजपने धरला आहे. तर शिवसेनेने गृहमंत्रिपदावरील दावा सोडलेला नाही. यावरुन शिवसेना आणि भाजपमध्ये रस्सीखेच सुरु आहे.

आज मुंबईत महायुतीची बैठक होणार आहे .यात हा तिढा सुटेल, असे वाटते. येत्या दोन दिवसात मुख्यमंत्रीपदी कोण विराजमान होणार याची घोषणा होणार आहे. देवेंद्र फडणवीस यांच्या नावाला पसंती असली तरी भाजपच्या धक्कातंत्रामुळे नवीन नाव समोर येण्याची शक्यता नाकारता येत नाही.

दिल्लीतील बैठकीत भाजपाने काही मुद्दे शिंदे आणि अजित पवारांना अगदी स्पष्टपणे सांगितल्याचीही माहिती समोर येत आहे. केंद्रीय गृहमंत्री अमित शाह यांच्यासमोर एकनाथ शिंदे यांनी शिवसेनेची भूमिका मांडताना 12 मंत्रिपदांची मागणी केली असल्याची माहिती आहे.

विधान परिषदेच्या सभापती पदाची देखील शिवसेनेकडून मागणी करण्यात आली आहे. गृहमंत्रिपदाबरोबरच नगरविकास आणि इतर महत्वाची खातीही शिवसेनेला हवी आहेत. पालकमंत्री पद देताना देखील पक्षाचा योग्य सन्मान राखावा, अशी विनंती अमित शहांकडे शिंदे यांनी केली आहे.