Maratha Reservation Video : मराठा आरक्षणप्रश्नी सरकारच्या हालचालींना वेग; देवेंद्र फडणवीसांनी रात्रीच घेतली बैठक, ॲडव्होकेट जनरलही उपस्थित

Maratha Reservation News : मनोज जरांगे पाटील यांचा उपोषणाचा आज चौथा दिवस आहे. आजपासून आपण पाणीही घेणार नाही, असे त्यांनी जाहीर केले आहे. त्यामुळे रविवारी रात्रीच सरकारकडून मराठा आंदोलनावर तोडगा काढण्यासाठी हलचाली सुरू करण्यात आल्या होत्या. रविवारी रात्री मुख्यमंत्री देवेंद्र फडणवीस यांच्या अध्यक्षतेखाली त्यांच्या वर्षा निवासस्थानी बैठक पार पडली.

या बैठकीसाठी ॲडव्होकेट जनरल बिरेंद्र सराफ हे देखील उपस्थित होते. मनोज जरांगे यांनी मराठ्यांना ओबीसीतून आरक्षण द्या तसेच सरसकट कुणबी प्रमाणपत्र देण्याची मागणी केली आहे. त्यांच्या या मागणीमुळे कोर्टाच्या निर्णयाचे उल्लंघन होण्याची शक्यता आहे. याचा विचार करून याविषयी बिरेंद्र सराफ यांच्यासोबत चर्चा करत कसा तोडगा निघेल याचे प्रयत्न करण्यात आले.

मराठा उपसमितीने देखील काल बैठक घेतली होती. उपसमितीचे अध्यक्ष, मंत्री राधाकृष्ण विखे पाटील हे देखील मुख्यमंत्र्यांच्या निवासस्थानी झालेल्या बैठकीला हजर होते. उपसमितीकडून अंतिम प्रस्ताव तयार करण्यात येत असून तो मनोज जरांगे पाटील यांना देण्यात येणार आहे. नेमके या प्रस्तावामध्ये काय असणार आहे हे समजू शकले नाही.

उपसमिती-ॲडव्होकेट जनरल यांच्यात चर्चा

सुप्रीम कोर्टाने मागील काही प्रकरणांमध्ये सरसकट कुणबी प्रमाणपत्र देता येणार नसल्याचे म्हटले होते. त्यामुळे जरांगेंच्या मागणीवर मराठा उपसमितीने ॲडव्होकेट जनरल यांच्याशी तब्बल 50 मिनिटे चर्चा केली. रविवारी सायंकाळी पाच वाजता ॲडव्होकेट जनरल बिरेंद्र सराफ यांनी मराठा उपसमितीला वेळ दिली होती. त्यानंतर बिरेंद्र सराफ हे रात्री मुख्यमंत्र्यांसोबत झालेल्या बैठकीला देखील हजर होते.

मराठा आंदोलक आक्रमक

मनोज जरांगे पाटील यांनी आजपासून पाणी देखील घेणार नसल्याचे जाहीर केले आहे. त्यांच्या उपोषणाचा आज चौथा दिवस आहे. त्यात त्यांची प्रकृती देखील खालवत जात असल्याने मराठा आंदोलक आक्रमक झाले आहेत. मराठ्यांना आरक्षण दिले नाही तर आपण मंत्रालयत कचरा फेकू, असा इशारा देखील आंदोलकांकडून देण्यात आला आहे. आरक्षण घेतल्याशिवाय मुंबई सोडणार नसल्याचे देखील जरांगे पाटील यांनी जाहीर केले आहे.