भाजपच्या प्रहारानंतर अखेर नितीन राऊतांची माघार

मुंबई : वादग्रस्त फेसबूक पोस्ट टाकत वाद ओढवून घेणारे काँग्रेसचे नेते व ऊर्जा मंत्री नितीन राऊत (Nitin Raut) यांनी अखेर माघार घेतली आहे. स्वातंत्र्यवीर सावरकर (Veer Sawarkar) यांच्याविषयी ही पोस्ट होती. त्यावर भाजप नेत्यांनी जोरदार टीका केली. तसेच राऊतांविरोधात ठिकठिकाणी आंदोलनही करण्यात आले. त्यानंतर राऊंतानी ही फेसबूक पोस्ट हटवली आहे.

इंदिरा गांधी (Indira Gandhi) यांच्या काळात छापण्यात आलेली दोन टपाल तिकीटं राऊतांनी फेसबुकवर टाकली होती. त्यामध्ये एक तिकीट सावरकर यांचे तर दुसरं तिकीट एका माकडावर काढण्यात आलेलं होतं. या टपाल तिकीटांच्या किंमतीवर राऊतांनी वादग्रस्त भाष्य केलं आहे. माकडाची किंमत पाच पटीने जास्त आहे, असं राऊत यांनी या पोस्टमध्ये म्हटले होतं.

या पोस्टनंतर राऊंताविरोधात मुंबईत भाजपने आंदोलन केले. तसेच आमदार नितेश राणे यांनीही राऊंतावर पलटवार केला. 'इंदिरा गांधींच्या काळात स्वातंत्र्यवीर सावरकरांचे तिकीट छापले होते हे तर माहित होते. पण इंदिराजींनी या लंगूराचे पण बालपणीच तिकीट काढले होते हे आजच समजले, अशी खोचक टीका राणे यांनी राऊतांवर केली आहे. वाद वाढू लागल्यानंतर राऊतांनी ही पोस्ट डिलिट केली करत वादावर पडदा टाकण्याचा प्रयत्न

नेमकं काय प्रकरण आहे?

केंद्रीय संरक्षण मंत्री राजनाथ सिंह (Rajnath Singh) यांनी काही दिवसांपूर्वी सावरकरांविषयी एक वक्तव्य केलं होतं. महात्मा गांधींच्या सांगण्यावरूनच सावकरांनी इंग्रजांची माफी मागितली होती, असं ते म्हणाले होते. त्यावरून पुन्हा एकदा वाद-प्रतिवाद सुरू झाले होते. त्याचपार्श्वभूमीवर राऊत यांनी ही टपाल तिकीटं आपल्या फेसबूक अकाऊंटवर पोस्ट केली आहेत. सावरकर यांच्यावरील टपाल तिकीट 20 रुपयाचे तर माकडावरील टपाल तिकीट 100 रुपयांचे आहे.

त्याचआधारे राऊत यांनी ही पोस्ट टाकली आहे. 'इंदिरा गांधींच्या काळात ही टपाल तिकिटं छापण्यात आली होती. माकडाची किंमत पाच पटीने जास्त आहे,' असं राऊत म्हणाले आहेत. त्यावरून वाद निर्माण झाला असून अनेकांनी त्यांना ट्रोल केले आहे. सामाजिक कार्यकर्ते विश्वंभर चौधरी यांनीही राऊत यांच्या या पोस्टवर नाराजी व्यक्त करत त्यांच्यावर टीका केली आहे. चौधरी आपल्या फेसबूक पोस्टमध्ये म्हणतात की, सावरकरांच्या बाबतीत आपल्या मनात कोणतेही विचार असू शकतात. मी स्वतः सावरकरांचा कट्टर विरोधक आहे आणि राहीन. पण एका कॅबिनेट मंत्र्याच्या पेज वर ही पोस्ट नक्कीच शोभत नाही. गांधीजींचे तीन समकालीन विरोधक होते- सावरकर, आंबेडकर आणि जिना. पण या तिघांवरही गांधीजींनी कधीही कठोर वैयक्तिक टीका केल्याची नोंद नाही.

अर्थात हे काॅग्रेसच्या या मंत्री महोदयांना सांगण्यात अर्थ नाही. गांधी कळले असते तर त्यांच्या पक्षावर दुसऱ्या एका हिंदुत्ववादी पक्षाच्या आश्रयानं सत्ता उपभोगण्याची वाईट वेळ आली नसती. आजचा सत्तेतला मुख्य पक्ष हिंदुत्ववादी पक्ष आहे आणि तो सावरकरांना भारतरत्न द्यावं याचा खुलेआम पुरस्कार करत आहे तरीही नितीन राऊत सत्तेला चिटकून का बसले आहेत, असा सवार चौधरी यांनी केला आहे.