Navi Mumbai Assembly Election : मोठी बातमी : गणेश नाईक शरद पवारांच्या भेटीला, भाजपची साथ सोडणार?

Navi Mumbai News, 19 Oct : आगामी विधानसभा निवडणुकीच्या अनुषंगाने राजकीय घडामोडींना वेग आला आहे. उमेदवारीसाठी इच्छुक असणारे अनेक नेते सध्या आहेत त्या पक्षात तिकीट मिळण्याची शक्यता नसल्याने इतर पक्षात जाण्याचा निर्णय घेत आहेत.

अशातच आता नवी मुंबईतील बडे प्रस्थ असलेले भाजप नेते गणेश नाईक (Ganesh Naik) हे भाजपला सोडचिठ्ठी देत तुतारी हाती घेणार असल्याची शक्यता वर्तवली जात आहे.

गणेश नाईक हे राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार (Sharad Pawar) यांच्या भेटीला निघाल्याची माहिती सुत्रांनी साम टीव्हीला दिली आहे. त्यामुळे आता नाईक हे तुतारी हाती घेणार असल्याच्या चर्चांना उधाण आलं आहे.

नाईक का सोडताहेत भाजपची साथ

नवी मुंबईत राजकीय दबदबा असलेले गणेश नाईकांनी ऐरोली आणि बेलापूर मतदारसंघावर दावा केला आहे. मात्र, त्यांची ही मागणी महायुतीकडून पूर्ण होण्याची शक्यता कमी आहे. कारण सध्या बेलापूर मतदारसंघात भाजपच्या (BJP) मंदा म्हात्रे या आमदार आहेत.

त्यामुळे त्यांना या जागा मिळण्याची शक्यता कमी असल्यामुळे ते पवारांच्या राष्ट्रवादीत जाण्याच्या तयारीत असल्याचं सांगितलं जात आहे. अशातच आता ते पवारांची भेट घेण्यासाठी निघाल्याने या भेटीत नेमकी काय खलबतं होणार याकडे सर्वांचं लक्ष लागलं आहे. शिवाय नाईकांनी भाजपची साथ सोडल तर हा महायुतीसाठी मोठा धक्का असू शकतो.