Prajakt Tanpure News : प्राजक्त तनपुरे विधानसभेत आक्रमक, अध्यक्षांनी भाषण थांबवलं अन् अजितदादा म्हणाले, "मला..."

विधीमंडळ अर्थसंकल्पीय अधिवेशनाचा आज गुरूवारी ( 29 फेब्रुवारी ) चौथा दिवस आहे. अर्थसंकल्पावर दोन्ही सभागृहात सदस्यांकडून चर्चा केली जात आहे. राष्ट्रवादी काँग्रेस शरदचंद्र पवार पक्षाचे आमदार प्राजक्त तनपुरे ( Prajakt Tanpure ) शेतकऱ्यांच्या प्रश्नावरून विधासभेत आक्रमक झाल्याचे पाहायला मिळाले. यावेळी उपमुख्यमंत्री अजित पवार ( Ajit Pawar ) यांनी केलेल्या एका वक्तव्यावरून एकच हशा पिकला.

नेमकं काय घडलं?

प्राजक्त तनपुरे ( Prajakt Tanpure ) यांनी शेतकऱ्यांना रात्री देण्यात वीजेवरून सरकार घेरलं. प्राजक्त तनपुरे म्हणाले, "शेतकऱ्यांना दिवसा वीज मिळावी, अशी खूप दिवसांपासून अपेक्षा आहे. अर्थसंकल्पात सौर उर्जेचा उल्लेख बऱ्याच ठिकाणी वाचला आहे. पण, शेतीपंप सौर उर्जेवर केले, तर याचा फायदा शेतकऱ्यांसह उद्योगांनाही होणार आहे. कारण, शेतकऱ्यांना सौर पॅनेल दिले, तर उद्योगांना दिल्या जाणाऱ्या वीजबिलात कपात करता येईल. मात्र, दुर्दैवानं सरकार याकडे लक्ष देत नाही."

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"दिवसा वीज दिली जाणार असल्याचं आम्ही सतत ऐकत आलोय. प्रत्यक्षात काहीच होत नाही. वारंवार जनतेच्या भावना आम्ही विधानसभेत मांडत आलोय. महाविकास आघाडीचं सरकार असताना माझ्या मतदारसंघात मुख्यमंत्री सौर कृषी पंप योजनेचे चार प्रकल्प होते. अजितदादांनी त्याचं भूमिपूजन केलं होतं. मात्र, महाविकास आघाडीचं सरकार गेल्यानंतर उरलेल्या प्रकल्पांकडे कुणी पाहतच नाही. प्रकल्पांचे काम झाले असते, तर शेतकऱ्यांना दिवसा वीज मिळू शकली असती. पण, पुढं काम झालेलं नाही," अशी खंत प्राजक्त तनपुरेंनी व्यक्त केली.

यावेळी तालिका अध्यक्षांनी प्राजक्त तनपुरेंचं भाषण थांबवलं. तेवढ्यात अजित पवारांनी ( Ajit Pawar ) म्हटलं, "मला येऊन भेट...". अजित पवारांच्या वक्तव्यानंतर एकच हशा पिकला.

प्राजक्त तनपुरे म्हणाले, "दिवसा वीज मिळावी, ही शेतकऱ्यांची अपेक्षा आहे. यासाठी महाविकास आघाडीचं सरकार असताना आम्ही प्रयत्न केले. पण, आता प्रत्येक अधिवेशनात ओरडून ओरडून सांगत आहे. पुढं काहीही होत नाही. आता दादांनी सांगितलं मला येऊन भेट... म्हणजे निधी मागण्यासाठी दादांना भेटत असतो."