Ulhasnagar Politics : महापौरांच्या खुर्चीचा ‘रिमोट कंट्रोल’ कलानी महलमध्ये? ओमी कलानींच्या दाव्याने नवा राजकीय वाद

नवनीत बऱ्हाटे

Omi Kalani News : महापौरांच्या खुर्चीवर अश्विनी निकम असल्या, तरी त्या खुर्चीच्या निर्णयांचा ‘रिमोट कंट्रोल’ कुणाच्या हातात आहे? उल्हासनगरच्या राजकारणात वर्षानुवर्षे प्रभाव राखणाऱ्या कलानी कुटुंबाबाबत सुरू असलेल्या या चर्चेला आता खुद्द युवा नेते ओमी कलानी यांच्या वक्तव्याने नवे वळण मिळाले आहे. “महापौर अश्विनी निकम शंभर टक्के माझ्या म्हणण्यानुसार काम करतात,” असा थेट दावा ओमी कलानी यांनी पत्रकारांशी बोलताना केल्याने राजकीय वर्तुळात खळबळ उडाली.

त्यांच्या या वक्तव्यामुळे उल्हासनगर महापालिकेतील विकासकामे आणि राजकीय निर्णयांची सूत्रे महापालिका मुख्यालयातून नव्हे, तर ‘कलानी महल’मधून हलतात का, असा सवाल उपस्थित झाला आहे.

गेल्या काही काळापासून ओमी कलानी शहराच्या राजकीय पटलावर फारसे सक्रिय दिसत नसल्याची चर्चा सुरू होती. यासंदर्भात विचारण्यात आले असता त्यांनी ही चर्चा स्पष्टपणे फेटाळली. “मी सक्रिय नाही, असे म्हणणे चुकीचे आहे. महापालिकेतील महापौर अश्विनी निकम शंभर टक्के माझ्या म्हणण्यानुसार काम करतात. माझे वडील पप्पू कलानी दररोज सायंकाळी सहा ते नऊ या वेळेत खासदार कार्यालयात नागरिकांसाठी उपलब्ध असतात आणि आमचे काम पूर्ण ताकदीने सुरू आहे,” असे ओमी कलानी यांनी म्हटले.

अश्विनी निकम या शहराच्या प्रथम नागरिक असून त्यांनी नुकतेच बीए एलएलबीचे शिक्षण पूर्ण केले आहे. त्यामुळे त्यांच्या शिक्षणाचा आणि कायद्याच्या ज्ञानाचा शहराच्या विकासासह महापालिकेच्या निर्णयप्रक्रियेत फायदा होईल, अशी अपेक्षा होती. मात्र ओमी कलानी यांच्या दाव्यामुळे महापौर स्वतंत्रपणे निर्णय घेतात की त्यांच्या निर्णयांवर कलानी कुटुंबाचा प्रभाव आहे, यावर आता राजकीय चर्चा रंगण्याची चिन्हे आहेत.

कलानी कुटुंबाचा प्रभाव

उल्हासनगरच्या राजकारणावर कलानी कुटुंबाचा अनेक वर्षांपासून प्रभाव राहिला आहे. महापालिकेतील सत्तेच्या आणि विकासकामांच्या निर्णयांमध्येही त्यांचा प्रभाव असल्याचे आरोप विरोधकांकडून वेळोवेळी केले गेले आहेत. आता ओमी कलानी यांच्या या वक्तव्यामुळे त्या चर्चेला पुन्हा बळ मिळाले आहे.