Uddhav Thackeray : मेहबूबा मुफ्ती यांच्याशेजारी बसण्याचे उद्धव ठाकरेंनी सांगितले कारण..

Patna News : विरोधी पक्षांची बैठक शुक्रवारी झाली. या बैठकीला देशातील 15 विरोधी पक्षातील नेत्यांनी हजेरी लावली होती. यात जम्मू-काश्मिरच्या माजी मुख्यमंत्री मेहबूबा मुफ्ती देखील आलेल्या होत्या. त्यावेळी त्यांच्या शेजारी उद्धव ठाकरे हे बसलेले पाहायला मिळाले. यावरुन भाजपने ठाकरेंवर टीका केली आहे.

आपण मुफ्तींच्या शेजारी का बसलो याचं कारण शनिवारी उद्धव ठाकरे यांनी सांगितले. आज (शनिवारी) दादरच्या शिवाजी मंदिरात ठाकरे गटाच्या शाखाप्रमुखांचा मेळावा आयोजित करण्यात आला होता. यावेळी उद्धव ठाकरे बोलत होते.

"काल मी पाटण्याला गेलो होतो तिथे बघितलं मेहबुबा मुफ्ती आहेत. मुद्दामून मी त्यांच्या बाजूलाच जाऊन बसलो. कारण आता काय त्या भाजपबरोबर सत्ता स्थापन केल्यानंतर स्वच्छ झालेल्या आहेत. त्यामुळे आपण त्यांच्या बाजूला बसल्याने आपणही स्वच्छ होऊ," असे म्हणत ठाकरेंनी भाजपवर निशाणा साधला. मुफ्तींच्या शेजारी बसल्याने ठाकरेंवर टीका करणाऱ्या भाजपच्या नेत्यांना ठाकरेंनी सुनावलं. यावेळी ठाकरेंनी मुफ्तींसोबतचे नरेंद्र मोदी, अमित शाह यांचे फोटो दाखवले.

पीडीपीच्या नेत्या मेहबूबा मुफ्ती यांच्याशेजारी बसून उद्धव ठाकरे हे युतीच्या चर्चा करीत असल्याचे पाहून अचंबित झाल्याचा टोमणा उपमुख्यमंत्री देवेंद्र फडणवीस यांनी मारला आहे. त्यांच्या या टोमण्याला उद्धव ठाकरे यांनी पलटवार केला आहे. तर त्यांनी विरोधकांच्या बैठकीत मुफ्तींच्या शेजारी बसण्याचे कारण देखील सांगितले आहे.

"मी मुफ्तींचा बाजूला मुद्दाम बसलो होतो. मुफ्तींना मोदींनी ३७० कलम हटविणार नाही, असे वचन दिले होते. त्यामुळे मुफ्ती यांनी मोदींना पाठिंबा दिला होता. पण मोदींनी ते आश्वासन पाळलं नाही. ३७० कलम त्यांनी हटवलं. मिळेल तिथं खा, ही आमची परंपरा नाही," अशा शब्दात ठाकरेंनी भाजप नेत्यांना सुनावलं. काश्मिरमध्ये अजूनही निवडणुका का घेतल्या जात नाही, असा प्रश्न ठाकरेंनी यावेळी उपस्थित केला.