नवी दिल्ली : देशांतील पाच राज्यांतील विधानसभा निवडणुकीची रणधुमाळीमुळे पेट्रोल (Petrol) आणि डिझेलचे (Diesel) दर मागील चार महिन्यांहून अधिक काळ स्थिर होते. आंतरराष्ट्रीय बाजारात खनिज तेलाच्या (Crude Oil) भावाचा भडका उडूनही पेट्रोलियम कंपन्यांनी दरवाढ टाळली होती. आता निवडणुकीनंतर पहिला मोठा धक्का बसला आहे. पेट्रोल, डिझेलच्या दरात वाढ करण्यात आली आहे. याचवेळी स्वयंपाकाचा गॅस सिलिंडरची तब्बल 50 रुपयांनी महागला आहे. (Petrol Diesel price hike News)
सुमारे चार महिन्यांनंतर आज पेट्रोल, डिझेलच्या दरात वाढ सुरू झाली आहे. पेट्रोल आणि डिझेलच्या दरात प्रतिलिटर 80 पैसे वाढ करण्यात आली आहे. दिल्लीत पेट्रोलचा दर प्रतिलिटर 96.21 रुपये झाला असून, डिझेलचा दर 87.47 रुपये आहे. याचवेळी स्वयंपाकाचा गॅस (LPG) सिलिंडरच्या दरातही वाढ करण्यात आली आहे. ऑक्टोबर महिन्यानंतर ही पहिली दरवाढ आहे.
घाऊक ग्राहकांसाठी डिझेलच्या दरात प्रतिलिटर तब्बल 25 रुपयांची वाढ करण्यात आली आहे. यामुळे मुंबईत डिझेलचा दर प्रतिलिटर 122.05 रुपयांवर गेला आहे. याचवेळी किरकोळ ग्राहकांसाठी डिझेलचा दर प्रतिलिटर 94.14 रुपये आहे. दिल्लीत घाऊकचा डिझेल दर प्रतिलिटर 115 रुपये आणि किरकोळसाठी प्रतिलिटर 86.67 रुपये आहे. घाऊक ग्राहकांमध्ये बस चालवणाऱ्या राज्य सरकारी कंपन्या, मॉल तसेच, इतर उद्योग त्यांच्या वापरासाठी मोठ्या प्रमाणात डिझेल खरेदी करतात. त्यांच्यासाठी किरकोळ ग्राहकांपेक्षा आता अधिक दर आकारण्यात आला आहे.
रशियाने युक्रेनवर पुकारलेल्या युद्धाचे चटके आता सगळ्यांनाच बसू लागले आहेत. पेट्रोलियम कंपन्यांनी पेट्रोल, डिझेलचे दर स्थिर ठेवले असले तरी आंतरराष्ट्रीय पातळीवर खनिज तेलाच्या भावाचा भडका उडाला आहे. खनिज तेलाचा भाव आता प्रतिबॅरल 110 डॉलरवर गेला आहे. यामुळे पेट्रोलियम कंपन्यांना दरवाढ करण्याशिवाय पर्याय नाही. असे असतानाही उत्तर प्रदेशसह पाच राज्यांमधील विधानसभा निवडणुकीच्या काळात पेट्रोल, डिझेलचे दर सुमारे चार महिने स्थिर होते. या निवडणुकांच्या निकालानंतर पेट्रोल, डिझेल आणि एलपीजी सिलिंडरच्या दरात आता वाढ सुरू झाली आहे. याआधी सीएनजीचा दरात सातत्याने वाढ करण्यात आली असून, यानंतर पेट्रोल, डिझेल आणि एलपीजी सिलिंडरचा नंबर असेल, अशी शक्यता वर्तवण्यात येत होती. यामुळे आगामी काळात सर्वसामान्यांचे बजेट कोलमडणार आहे.
देशात सध्या महागाईचा भडका उडाल्याने मागील वर्षी मोदी सरकारने (Modi Government) पेट्रोल, डिझेलवरील उत्पादन शुल्क कमी केले. यानंतर पाच राज्यांतील विधानसभा निवडणुका (Assembly Elections) असल्यामुळे पेट्रोल, डिझेलच्या दरवाढीला ब्रेक लागला होता. या निवडणुका संपल्या असून, या पेट्रोल, डिझेलच्या दरवाढीचा भडका उडण्याचा अंदाज आहे. पेट्रोलचा दर प्रतिलिटर 12 ते 25 रुपये वाढण्याची शक्यता आहे. मोदी सरकारने गेल्या वर्षी 4 नोव्हेंबरला पेट्रोलवरील उत्पादन शुल्कात (Excise Duty) 5 रुपये आणि डिझेलवरील उत्पादन शुल्कात 10 रुपये कपात केली. यानंतर पेट्रोलियम कंपन्यांकडूनही दरवाढ थांबवण्यात आली होती.
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.