Rahul Narwekar News : राहुल नार्वेकरांचं मोठं विधान; म्हणाले, "मी लवकरच क्रांतीकारी निर्णय..."

Rahul Narwekar Statement : सर्वोच्च न्यायालयाने शिंदे गटाच्या १६ आमदारांना अपात्र ठरवण्याचा निर्णय घेण्याचा अधिकार विधानसभा अध्यक्ष राहुल नार्वेकर यांना दिला आहे. नार्वेकरांनी योग्य काळात यावर निर्णय घेणे अपेक्षित असल्याचेही न्यायालयाने नमूद केले. त्यानंतर नार्वेकर आता काय निर्णय घेतील याकडे राज्यासह संपूर्ण देशाचे लक्ष लागले आहे. असे असताना नार्वेकरांनी लवकरच क्रांतीकारी निर्णय घेईन, असे विधान केले. त्यामुळे राज्यातील राजकीय वर्तुळातून भुवया उंचवल्या आहेत.

न्यायालयाच्या निकालानंतर (Uddhav Thackeray) ठाकरे गटाकडून विधानसभा अध्यक्षांनी १५ दिवसांत निर्णय घ्यावा, अशी मागणी केली होती. त्यावर नार्वेकरांनी ठाकरे गटाला सडेतोड उत्तर दिले होते. ते म्हणाले होते की, "मागण्या सर्वजण करतात. मात्र, कायद्यानुसार काही तरतूदी आहेत. इतरही काही कायदेशीर बाबी आहेत. त्या सर्व प्रक्रिया पूर्ण केल्यानंतरच निर्णय घेण्यात येईल.

यानंतर निर्णय घेण्यासाठी विलंब करायचा नाही, असेही त्यांनी स्पष्ट केले होते. राहुल नार्वेकर (Rahul Narwekar) म्हणाले होते की,"आपल्याला निर्णय घेण्यासाठी घाई करायची नाही व विलंबही करायचा नाही. जो निर्णय होईल, तो निर्णय संविधानातील तरतुदी व न्यायालयाच्या निर्देशानुसारच घेतला जाईल."

दरम्यान, आज बुधवारी (ता. ७) राजभवनात आयोजित केलेल्या कार्यक्रमात नार्वेकरांनी एक विधान केले. त्यामुळे आता शिंदे गटाच्या (Shivsena) १६ आमदारांबाबत लवकरच निर्णय येण्याची शक्यता वर्तविली जात आहे. नार्वेकरांनी यावेळी माजी विधानसभा अध्यक्ष बाळासाहेब देसाईंच्या कामाचा दाखला दिला. त्यामुळे चर्चांना उधाण आले आहे.

राहुल नार्वेकर म्हणाले, "१९७७ साली माझा जन्म झाला. त्याच साली बाळासाहेब देसाईंवर विधानसभा (Vidhansabha) अध्यक्षपदाची जाबाबदारी आली. त्यांनी आपल्या राजकीय आयुष्यात काही क्रातिकारी निर्णय घेतले. त्याच प्रमाणे कदाचीत मीही लवकरच क्रांतीकारी निर्णय घेईन." नार्वेकरांच्या या विधानाने लवकरच शिंदे गटाच्या आमदारांबाबत मोठा निर्णय होण्याची शक्यता वर्तवली जात आहे.

(Edited by Sunil Dhumal)