BMC Update : शिवसेना भवन माझे हृदय, नीट काळजी घे! उद्धव ठाकरेंनी फोन केलेल्या मनसे नगरसेवकाला राज ठाकरेंनी केलं 'नेता'...

Yashwant Killedar MNS : मुंबई महापालिकेच्या निवडणुकीत उद्धव ठाकरे यांची शिवसेना आणि राज ठाकरेंच्या महाराष्ट्र नवनिर्माण सेनेची पहिल्यांदाच युती झाली होती. या निवडणुकीत ठाकरे बंधूंना एकूण ७१ जागांवर विजय मिळाला. त्यापैकी सहा जागांवर मनसैनिक निवडून आले. सहापैकी सर्वाधिक चर्चेचा विजय ठरला तो प्रभाग क्रमांक १९२ मधील.

मनसेचे उपशहर प्रमुख यशंवत किल्लेदार हे या प्रभागातून विजयी झाले आहेत. या प्रभागाचे वैशिष्ट्ये म्हणजे शिवसेना भवनही याच प्रभागात आहे. त्यामुळे ठाकरे बंधूंसाठी या प्रभागातील विजय प्रतिष्ठेचा होता. किल्लेदार यांनी त्यांचा विश्वास सार्थ ठरवत विजय मिळविला. आता त्यांच्याच खांद्यावर राज ठाकरेंनी मोठी जबाबदारी टाकली आहे.

शिवतीर्थवर आज झालेल्या मनसेच्या वरिष्ठ नेत्यांच्या बैठकीमध्ये किल्लेदार यांची महापालिकेतील पक्षाचे गटनेते म्हणून निवड करण्यात आली आहे. मनसेच्या वतीने ते महापालिकेत किल्ला लढविणार आहेत. किल्लेदार यांच्याविरोधात एकनाथ शिंदे यांच्या शिवसेनेच्या प्रीती पाटणकर मैदानात होत्या. त्या ठाकरेंच्या शिवसेनेच्या माजी नगरसेविका होत्या. त्यामुळे या लढतीकडे संपूर्ण मुंबईचे लक्ष लागले होते.

किल्लेदार विजयी झाल्यानंतर उद्धव ठाकरेंनी त्यांना अभिनंदनासाठी केला होता. शिवसेना भवन माझे हृदय आहे. ते याच प्रभागात येते. त्यामुळे त्याची नीट काळजी घे, असे ठाकरे किल्लेदारांना म्हणाले होते. किल्लेदारांनीही तुमचे हृदय सांभाळले, असे म्हटले होते. आता याच किल्लेदारांवर राज ठाकरेंनी महापालिकेची महत्वाची जबाबदारी टाकली आहे.

दरम्यान, मुंबई महापालिकेत भाजपचा महापौर विराजमान होणार आहे. निवडणुकीच्या प्रचारादरम्यान भाजप-शिवसेना युती विरूध्द ठाकरे बंधू असा थेट सामना झाला होता. एकमेकांवर आरोप-प्रत्यारोपांच्या फैरी झडल्या होत्या. प्रत्यक्ष महापालिकेचे कामकाज सुरू झाल्यानंतरही हा टोकाचा वाद पाहायला मिळण्याची शक्यता आहे. त्यामुळे राज ठाकरेंचे विश्वासू किल्लेदारांवर मोठी जबाबदारी असणार आहे. अर्थात उद्धव ठाकरेंचे शिलेदारांना सोबत घेऊनच त्यांना भाजप-शिवसेना युतीला भिडावे लागणार आहे.