Maharashtra Politics : शिंदेंना चेकमेट करण्यासाठीच फडणवीसांनी दोन्ही ठाकरेंना एकत्र आणण्याचा प्लॅन केला, माजी खासदाराचा खळबळजनक दावा

Mumbai News, 04 Jul : मनसे प्रमुख राज ठाकरे आणि ठाकरेंच्या शिवसेनेचे सर्वेसर्वा उद्धव ठाकरे हे दोन्ही नेते उद्या (ता. 05) विजयी मेळाव्याच्या निमित्ताने मुंबईत एकाच व्यासपीठावर येणार आहेत.

त्यामुळे आता दोन्ही ठाकरे बंधू एकत्र आले असून ते भविष्यात देखील अशीच युती ठेवणार की स्वतंत्र राहणार याबाबतची उत्सुकता अनेकांना लागली आहे. ठाकरे बंधुंची पुढील दिशा काय असेल ते उद्या कळेल, असं सूचक वक्तव्य ठाकरेंच्या शिवसेनेचे खासदार संजय राऊत यांनी केलं आहे.

ठाकरे उद्या एकत्र येण्याआधीच एमआयएमचे नेते आणि माजी खासदार इम्तियाज जलील यांनी एक खळबळजनक दावा केला आहे. दोन्ही ठाकरेंना एकत्र आणण्याचा प्लॅन मुख्यमंत्री देवेंद्र फडणवीस असून एकनाथ शिंदेंना चेकमेट करण्यासाठी त्यांनी ही एकी घडवून आणल्याचं जलील यांनी म्हटलं आहे.

इम्तियाज जलील नेमकं काय म्हणाले?

ठाकरे बंधुंच्या एकत्र येण्याच्या मुद्द्यावर बोलताना इम्तियाज जलील म्हणाले, "देवेंद्र फडणवीस यांना माहिती आहे की, एकनाथ शिंदे मुख्यमंत्री होण्यासाठी ठाकरेंना सोडून जाऊ शकतात. तर ते उद्या कोणी ऑफर दिली तरी ते जाऊ शकतात.

त्यामुळे त्यांना चेकमेट करण्यासाठी फडणवीसांची ही चाल आहे. तसंच मुंबईत दोन्ही ठाकरे बंधू एकत्र आले तर सर्वात जास्त फटका एकनाथ शिंदेंना बसेल, असंही ते यावेळी म्हणाले. दरम्यान, यावेळी त्यांनी भविष्यात ठाकरे बंधुंसोबत जाण्याबाबत सूचक वक्तव्य देखील केलं आहे.

तुम्ही शिवसेना आणि मनसेसोबत जाणार का? असा प्रश्न विचारला असता भाजपला हरवण्यासाठी आम्ही काहीही तडजोड करायला तयार आहोत. मराठी माणसाला जे हवं होतं ते होतं आहे. शिवाय आम्ही विरोधक असून मान्य करतो की शिवसेना ही मराठी माणसाची ताकद आहे, असंही जलील यावेळी म्हणाले. त्यामुळे आता जलील यांच्या दाव्यावर शिंदेंच्या शिवसेनेचे नेते काय प्रतिक्रिया देणार हे पाहणं महत्वाचं ठरणार आहे.