Mahayuti Government : सत्तास्थापनेला वेग; शिंदे-फडणवीसांच्या बैठकीत ‘त्या’ आमदारांना मंत्री न करण्याचा निर्णय

Mumbai, 25 November : राजकीय सत्तास्थापनेला राज्यात वेग आला असून नवे मुख्यमंत्री मुंबईतील वानखेडे स्टेडियमवर शपथ घेणार आहेत. तत्पूर्वी राजकीय रणनीती ठरविण्यासाठी महायुतीमधील पक्षांमध्ये बैठकांचा सिलसिला जोरात सुरू आहे. त्याच अनुषंंगाने एकनाथ शिंदे आणि देवेंद्र फडणवीस यांच्यात रविवारी रात्री उशिरा एक बैठक झाली असून त्यात मंत्रिमंडळाबाबत चर्चा झाली. त्यात मंत्रिपदाबाबत एक महत्वपूर्ण निर्णय झाल्याची सूत्रांची माहिती आहे.

विधानसभा निवडणुकीचे निकाल शनिवारी (ता. 23 नोव्हेंबर) घोषित झाले. त्यात महायुतीला (mahayuti) अनपेक्षित असे स्पष्ट बहुमत मिळाले आहे. राज्यात तब्बल 132 जागा जिंकत भारतीय जनता पक्ष मोठा सर्वांत मोठा पक्ष ठरला आहे. एकनाथ शिंदे यांच्या नेतृत्वाखालील शिवसेनेने 57, तर राष्ट्रवादी काँगेसने 41 जागा जिंकल्या आहेत, त्यामुळे मुख्यमंत्रिपदाबाबत मोठी उत्सुकता आहे.

दरम्यान, रविवारी (ता. 24 नोव्हेंबर) रात्री उशिरा एकनाथ शिंदे (Eknath Shinde) आणि देवेंद्र फडणवीस (Devendra Fadnavis) यांच्यात जवळपास एक तास बैठक झाल्याची माहिती सूत्रांनी दिली आहे. ही बैठक वर्षा बंगल्यावर झाल्याची माहिती आहे. देवेंद्र फडणवीस यांनी रविवारी रात्री वर्षा बंगल्यावर जाऊन एकनाथ शिंदे यांच्यासोबत चर्चा केली.

या बैठकीत मंत्रिमंडळ विस्ताराबाबत चर्चा झाल्याची माहिती आहे. यासोबतच भाजप आणि शिवसेना पक्षातील संभाव्य मंत्रिपदाच्या नावावर चर्चा झाल्याची माहिती आहे. रविवारी रात्री झालेल्या बैठकीत दोघांमध्ये मंत्रिपदाच्या विषयावर प्रामुख्याने चर्चा झाल्याची माहिती आहे.

गेल्या मंत्रिमंडळात ज्या आमदारांनी महायुतीमध्ये तेढ निर्माण केले आणि महायुतीला राजकीयदृष्ट्या संकटात आणलं, त्या सर्व आमदारांना मंत्रिमंडळापासून लांब ठेवण्याचा निर्णय  झाला  आहे. त्यामुळे कोणत्या वादग्रस्त आमदारांना मंत्रिपदापासून लांब राहावे लागणार आहे, हे एक दोन दिवसांत स्पष्ट होणार आहे.