Subhash Bhoir News : महापालिका निवडणुकीच्या तोंडावर उद्धव ठाकरे यांच्या शिवसेनेला भाजपने मोठे खिंडार पाडले आहे. कल्याण ग्रामीणचे शिवसेना उद्धव बाळासाहेब ठाकरे पक्षाचे माजी आमदार सुभाष भोईर हे आज मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश करणार आहेत.
शनिवारी सकाळी भोईर हे पदाधिकाऱ्यांसह मुंबईला रवाना झाले. यावेळी ठाणे जिल्हा परिषदेचे सदस्य रमेश पाटील, शिवसेनेचे उपतालुकाप्रमुख सुखदेव पाटील यांच्यासोबतच देसाई दिवा शीळ भागातील अनेक युवा पदाधिकारी मोठ्या संख्येने उपस्थित होते.
भोईर म्हणाले, मुळात मी भाजपचा 1986 मध्ये पहिला नगरसेवक म्हणून महापालिकेमध्ये सुरुवात केली होती. यशस्वी सुरुवात झाल्यानंतर काही कारणास्तव भाजप मला सोडावी लागली. विकास कामांसाठी प्रवाहाच्या विरोधात जाता येत नाही म्हणून प्रवाहाच्या बरोबर जाण्याचा आम्ही निर्णय घेतला आहे. भाजपात जाण्यास उशीर झाला असला तरी योग्य वेळी योग्य निर्णय आम्ही घेतलेला आहे. आमच्या या निर्णयाला लोकांचा पाठींबा आहे.
उद्धव ठाकरे यांच्या कठीण काळातही साथ न सोडणारे, कल्याण ग्रामीण मतदारसंघातील खंदे समर्थक म्हणून ओळखले जाणारे सुभाष भोईर यांनी भाजपात जाण्याचा निर्णय घेतल्याने राजकीय वर्तुळात खळबळ उडाली आहे.
2014 मध्ये शिवसेनेतून आमदारकीची निवडणूक जिंकणारे भोईर यांना 2019 मध्ये उमेदवारी नाकारण्यात आली होती. त्यानंतर 2024 च्या विधानसभा निवडणुकीत ठाकरे गटाकडून त्यांना पुन्हा संधी देण्यात आली होती. मात्र, या निवडणुकीत शिंदे गटाचे आमदार राजेश मोरे यांच्याविरोधात त्यांचा पराभव झाला.अखेर ऐन महापालिका निवडणुकांच्या तोंडावर त्यांनी भाजपची वाट धरल्याने ठाकरे गटाच्या अडचणी वाढल्या आहेत.
भोईर यांच्या भाजप प्रवेशामुळे कल्याण ग्रामीणमध्ये केवळ ठाकरे गटालाच नव्हे, तर उपमुख्यमंत्री एकनाथ शिंदे यांच्या शिवसेनेलाही नव्या आव्हानांना सामोरं जावं लागण्याची शक्यता वर्तवली जात आहे. कारण याच परिसरात खासदार श्रीकांत शिंदे यांचा लोकसभा मतदारसंघ असून, भाजपकडे झुकणाऱ्या विरोधकांची संख्या वाढताना दिसत आहे.
यापूर्वी ठाकरे गटाचे माजी नगरसेवक दीपेश म्हात्रे यांच्यासह अनेक दिग्गजांनी भाजपमध्ये प्रवेश केला आहे. त्यामुळे कल्याण–डोंबिवली परिसरात भाजपची ताकद लक्षणीयरीत्या वाढताना दिसत असून, आगामी ठाणे, कल्याण-डोंबिवली महापालिका निवडणुकीच्या पार्श्वभूमीवर या पक्षप्रवेशांना विशेष राजकीय महत्त्व प्राप्त झाले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.