Maharashtra Politics : निवडणुकीच्या तोंडावर उद्धव ठाकरेंना मोठा धक्का, भाजपने जिल्हाप्रमुख पळवला; अमृता फडणवीसांच्या उपस्थित होणार प्रवेश!

Dipesh Mhatre News : आगामी स्थानिक स्वराज संस्था निवडणुकीच्या पार्श्वभूमीवर तयारी करत असलेल्या शिवसेना उद्धव बाळासाहेब ठाकरे पक्षाला मोठा धक्का बसला आहे. कल्याणचे जिल्हाप्रमुख दीपक म्हात्रे हे भाजपमध्ये प्रवेश करणार आहेत. रविवारी (ता.9) सकाळी 10 वाजता डोंबिवली जिमखाना येते श मुख्यमंत्री फडणवीस यांच्या पत्नी अमृता फडणवीस यांच्या उपस्थित त्यांचा भाजप प्रवेश होणार आहे.

शिवसेनेत फूट पडली तेव्हा ते एकनाथ शिंदेंच्या शिवसेनेसोबत गेले होते. मात्र, नंतर त्यांनी ठाकरेंना साथ दिली. उद्धव ठाकरेंनी त्यांच्यावर विश्वास दाखवत जिल्हाप्रमुखपदाची माळ त्यांच्या गळ्यात टाकली. जिल्हाप्रमुख म्हणून त्यांनी ठाणे जिल्ह्यातील सर्व जिल्हाप्रमुखांपेक्षा विरोधी पक्ष म्हणून चांगली कामगिरी केल्याचे सांगितले जात मात्र राजकारणातील महत्त्वकांक्षेमुळे ते पुन्हा शिंदेंची शिवसेना आणि भाजपमध्ये जाण्याची तयारी असल्याची चर्चा होती.कल्याण-डोंबिवली महापालिकेचे महापौरपद, आमदारकी त्यांना खुणावत होती.

गेला महिनाभर दीपेश म्हात्रे यांच्या भाजपा प्रवेशाच्या बातम्या चर्चिल्या जात होत्या. स्वतः दीपेश म्हात्रे प्रत्येक वेळीस इन्कार करत होते. आपण उद्धव ठाकरेंच्या सोबत राहणार असून विभाग बैठका घेत आहोत असे सांगत होते. मात्र, हे सर्व घडत असताना त्यांच्या भाजपा नेतृत्वाशी वाटाघाटी सुरु होत्या. यापूर्वी ५ नोव्हेंबर रोजी पक्षप्रवेशाचा मुहूर्त हुकला होता. अखेरीस महापौर व आमदारकी या दुहेरी आश्वासनावर भाजपा प्रवेशाचा निर्णय झाल्याचे सांगितले जात आहे.

शुक्रवारी रात्री ठरला सगळा प्लॅन

शुक्रवारी रात्री डोंबिवलीतील कार्यकर्त्यांची एक बैठक त्यांच्या बंगल्यावर पार पडली. या बैठकीत डोंबिवली पश्चिमेतील बहुतांश कार्यकर्ते उपस्थित होते. तसेच पूर्वेतील दोन मोठ्या पदाधिकाऱ्यांना गळाला लावण्याचा प्रयत्न सुरु असल्याचे सांगितले जाते.

पदाधिकारी देखील सोडणार साथ...

दीपेश म्हात्रे हे ठाकरेंच्या शिवसेनेत आल्यानंतर निष्ठावंतांना डावलून त्यांना जिल्हाप्रमुख देण्यात आले होते. त्यामुळे जुने शिवसैनिक नाराज झाले होते. म्हात्रे यांनी आपल्या मर्जीतील लोकांना पदे वाटल्याचा आरोप देखील करण्यात येत होता. त्यामुळे ठाकरेंच्या शिवसेनेतील पदाधिकारी त्यांच्यासोबत भाजपमध्ये जाण्याची शक्यता वर्तवली जात आहे. संपर्कप्रमुख व अन्य महत्वाची पदे आयात नेत्यांना देण्यापेक्षा परिसरातीलच वर्षांनुवर्षे एकनिष्ठ असलेल्यांना दिली पाहिजेत. आयारामांमुळे संपूर्ण जिल्ह्यात संघटनेची अपेक्षित बांधणी झालीच नाही, अशी व्यथा ठाकरेंच्या शिवसेनेतील शिवसैनिक व्यक्त करत आहेत.