Mahesh Sawant : बाळासाहेबांनी शेंदूर फासलेल्या दगडाचा माज उतरवला..., ठाकरेंच्या आमदाराची शिंदेंच्या नेत्यावर बोचरी टीका

Mumbai News, 08 Dec : ठाकरेंच्या शिवसेनेचे (Shivsena) माहीम विधानसभा मतदारसंघाचे नवनिर्वाचित आमदार महेश सावंत यांनी शिंदे गटाचे नेते आणि नुकत्याच झालेल्या विधानसभा निवडणुकीत पराभूत झालेल्या सदा सरवणकर यांच्यावर जोरदार हल्लाबोल केला आहे.

मी सदा सरवणकरांचा माज उतरवला आणि मागचा हिशोब चुकता केला अशा शब्दात त्यांनी सरवणकरांवर टीका केली आहे. आमदार महेश सावंत माध्यमांशी बोलताना म्हणाले, "बाळासाहेब ठाकरेंनी (Balasaheb Thackeray) ज्या दगडाला शेंदूर फासला त्या सदा सरवणकर यांचा मला माज उतरवायचा होता आणि तो उतरवला.

त्यामुळे आता मागचा हिशोब चुकता झाला आहे. मी सरवणकरांच्या मुलाविरुद्ध देखील अपक्ष लढलो होतो. त्यावेळी केवळ पावणे दोनशे मतांनी माझा पराभव झाला होता. त्यावेळीचा हिशेब शिल्लक होता. तो आता चुकता झाला आहे.

शिवाय मी स्वत:ला भाग्यवान समजतो की, सरवणकर (Sada Saravankar) माझे प्रतिस्पर्धी म्हणून निवडणुकीच्या रिंगणात असतानाही मी लढलो. दोन वर्षांपूर्वी त्यांनी माझ्यावर फायरिंग केली होती. पण आम्ही बाळासाहेबांना वचन दिलं होतं की, कोणत्याही परिस्थितीत आम्ही माहीम मतदारसंघावर भगवा फडकवणार."

दरम्यान, माहीम मतदारसंघावर जो गद्दारीचा शाप लागला होता, तो आम्ही पुसून टाकल्याचंही ते सावंत (Mahesh Sawant) म्हणाले. आम्ही माहीमवर भगवा फडकवण्याची वाट पाहात होतो. या मतदारसंघावर जो गद्दारीचा शाप लागला होता. तो शिवसैनिकांनी आणि महाविकास आघाडीच्या कार्यकर्त्यांनी मिळून पुसून टाकला.

असं म्हणतच त्यांनी राज ठाकरेंचं (Raj Thackeray) आव्हान आम्ही विचारात घेतलं नव्हतं, असा टोला मनसेला लगवाला. कारण यंदाच्या विधानसभा निवडणुकीत माहिममध्ये तिरंगी लढत झाली. यामध्ये शिंदेंच्या शिवसेनेचे सदा सरवणकर ठाकरे गटाचे महेश सावंत आणि मनसेचे सर्वेसर्वा राज ठाकरे यांचे पुत्र अमित ठाकरे यांच्यात प्रमुख लढत झाली. या निवडणुकीतून महेश सावंत 1300 मतांनी निवडून आले.