Shivsena UBT-MNS : मोठी बातमी! उद्धव ठाकरेंचा खासदार अन् राज ठाकरेंच्या शिलेदाराची एकत्र पत्रकार परिषद; नेमकं कारण काय?

Shivsena UBT-MNS Press Meet : आगामी महापालिकेच्या निवडणुकीच्या दृष्टिने मनसे-शिवसेना उद्धव बाळासाहेब ठाकरे पक्षाच्या युती संदर्भात चर्चा सुरु आहेत. या चर्च सुरू असतानाचा उद्धव ठाकरेंचे खासदार अरविंद सावंत आणि मनसेचे शिलेदार नितीन सरदेसाई हे आज (बुधवारी) एकत्र पत्रकार परिषद घेत आहेत.

युतीच्या चर्चा सुरू असताना ठाकरें बंधुंचे शिलेदार एकत्र पत्रकार परिषदे घेत असल्याने ठाकरे बंधु एकत्र येण्याच्या चर्चांना उधान आले आहे. मुंबई महापालिकेच्या निवडणुकीसाठी मनसे-शिवसेना उद्धव बाळासाहेब ठाकरे पक्ष एकत्र येणार असल्याचे बोलले जात आहे. मात्र, पत्रकार परिषदेचा विषय वेगळाच असल्याचे समोर आले आहे. इंडिगो एअरलाइन्स कर्मचाऱ्यांच्या अडचणीच्या संदर्भात ही पत्रकार परिषद होणार आहे.

मागील काही दिवसांपासून मनसे आणि शिवसेना उद्धव बाळासाहेब ठाकरे पक्षाच्या युतीबाबत चर्चा सुरू असताना युती विरोधात मनसे नेते संदीप देशपांडे हे वक्तव्य करत आहेत. त्यामुळे युती होणार की नाही या विषयी संभ्रम आहे. देशपांडे यांच्या टीकेनंतर शिवसेना उद्धन बाळासाहेब ठाकरे पक्षाच्या नेत्यांनी सबुरीचे धोरण आखले आहे.

सुषमा अंधारे यांनी देशपांडे यांच्या वक्तव्यानंतर आपल्या फेसबूकवर पोस्ट करत महाराष्ट्राच्या हितापुढे किरकोळ वक्तव्यांना महत्त्व न देण्याचे शिवसैनिकांना आवाहन केले तसेच यावर घाईघाईत व्यक्त होऊ नका, असे देखील सांगितले. त्यामुळे उद्धव ठाकरे यांचा पक्ष सावध भूमिका घेत आहेत.

युतीचा निर्णय राज ठाकरेच घेणार

उद्धव ठाकरेंच्या शिलेदारांकडून वारंवार युतीबाबत सकारात्मक बोलले जात असताना संदीप देशपांडे संजय राऊत यांना टार्गेट करत युतीच्या चर्चेत मीठाचा खडा टाकत असल्याचे बोलले जात आहे. मात्र, संदीप देशपांडे यांनीच स्पष्ट शब्दांत सांगितले की, उद्धव ठाकरेंकडून युतीबाबत कोणताही अधिकृत प्रस्ताव मनसेला आला नाही. अधिकृत प्रस्ताव न देता केवळ माध्यमांमध्ये बाईट देऊन युती होत नाही. त्यामुळे अधिकृत प्रस्ताव त्यांच्याकडून आला तर त्यावर राज ठाकरेसाहेब निर्णय घेतील.