Shambhuraj Desai Big Statement : शिवसेनेची कोलांटउडी,जाहिरात आम्ही दिलीच नाही; शंभूराज देसाईंचा अजब दावा

Mumbai : शिवसेनेच्या मंगळवारी (दि.१३) वर्तमानपत्रामध्ये झळकलेल्या राष्ट्रात मोदी आणि महाराष्ट्रात शिंदे युतीत मिठाचा खडा पडला आहे. या जाहिरातीनंतर भाजप शिवसेनेत सारंकाही आलबेल नसल्याचं समोर आलं आहे. भाजप नेत्यांच्या नाराजीनंतर शिवसेना नेत्यांची सारवासारव करताना पुरती दमछाक झाली आहे. यावर आता शिंदे गटाचे नेते व मंत्री शंभूराज देसाई यांनी मोठं विधान करतानाच आजच्या जाहिरातीशी शिवसेना पक्षाशी कसलाही संबंध नाही, कोणीतरी शुभचिंतकानं ही जाहिरात दिली असल्याचं म्हटलं आहे.

मंत्री शंभूराज देसाई(Shambhuraj Desai) यांनी पत्रकारांशी संवाद साधला. यावेळी त्यांनी शिवसेनेच्या जाहिरातींवर भाष्य केलं. देसाई म्हणाले, आजच्या जाहिरातीशी शिवसेना पक्षाशी कसलाही संबंध नाही. कोणीतरी शुभचिंतकानं ही जाहिरात दिली आहे. पण आम्ही दोघंही एक नंबरला आहोत याचा आनंद आहे असं देसाई यांनी यावेळी सांगितले.

आमचे हितचिंतक अज्ञात आहेत...

तसेच आमचे हितचिंतक अज्ञात आहेत, लाखो हितचिंतकांपैकी एक कुणी असावा. ज्याने ही जाहिरात दिली आहे. आम्ही जाहिरात दिलीच नाही. कोण दिली कुठे दिली माहिती नाही. जाहिरातींशी शिवसेना(Shivsena) पक्षाचा कसलाही संबंध नाही असं स्पष्ट मत देसाई यांनी यावेळी व्यक्त केलं आहे.

शिवसेनेच्या झळकलेल्या जाहिरातींमुळे नवा वादंग निर्माण झाला आहे. यानंतर राज्यातलं राजकारण देखील चांगलंच ढवळून निघालं असून विरोधकांकडून भाजपला चांगलंच डिवचलं जात आहे. तसेच शिवसेनेचा कोट्यवधी रुपये खर्च करुन अशी जाहिरात देणारा हितचिंतक कोण आहे यावर राजकीय वर्तुळात चर्चांना उधाण आलं आहे.

फडणवीसांचा शिवसेना मंत्र्यांना 'हा' कानमंत्र ?

उपमुख्यमंत्री देवेंद्र फडणवीस(Devendra Fadnavis) यांनी शिवसेनेच्या मंत्र्यांशी बंद दरवाजाआड चर्चा केली. या बैठकीत फडणवीस म्हणाले, कोणीही चिंता करायची गरज नाही, या गोष्टी होतच राहणार आहे. सर्वांनी सर्वच गोष्टींची काळजी घेतली पाहिजे. आपण एकत्रच आहोत. ज्या गोष्टी कानावर पडतात त्याकडे दुर्लक्ष करा. युतीत खडा पडेल, असं कोणतंही वक्तव्य माध्यमांसमोर करू नका असा कानमंत्र फडणवीसांनी शिवसेनेच्या मंत्र्यांना दिल्याची चर्चा सुरु आहे.

(Edited By Deepak Kulkarni)