Sanjay Raut : ठाकरे बंधूंची भेट, संजय राऊतांचं 'मोठं स्टेटमेंट'; '...ते महाराष्ट्राच्या शत्रूंबरोबर!'

Mumbai News : उद्धव ठाकरे आणि राज ठाकरे कौटुंबिक सोहळ्यानिमित्ताने काल एकत्र आले होते. त्यावर महाराष्ट्राच्या राज्यात वेगवेगळ्या राजकीय प्रतिक्रिया उमटू लागल्या आहेत.

ठाकरे बंधूंच्या भेटीवर शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी मोठं स्टेटमेंट केलं आहे.

संजय राऊत म्हणाले, "ठाकरे बंधूंनी एकत्र यावे, ही चर्चा अनेक दिवसांपासून सुरू आहे. राज ठाकरे (Raj Thackeray) यांच्याबरोबर आणि त्यांच्या परिवाराबरोबर मित्रत्वाचे नाते आहे. उद्धव ठाकरे पक्षाचे नेते, माझे भाऊ आहेत. हे भाऊ एकत्र आल्याचा आनंद आहे. ठाकरे परिवारावर महाराष्ट्राचे प्रेम आहे. ठाकरे कुटुंबांचे महाराष्ट्राशी एक नातं आहे. ठाकरेंकडे त्याच दृष्टीने मराठी माणूस पाहतो".

'राज ठाकरे यांचा स्वतःचा पक्ष आहे. ते पक्षाचे काम करताना भाजपबरोबर (BJP) आहेत. देवेंद्र फडणवीस, नरेंद्र मोदी, अमित शाह हे त्यांचे आयडाॅल आहेत. आमच्या पक्षाचे तसे नाही. मोदी, फडणवीस, शाह हे महाराष्ट्राचे शूत्र आहेत. त्यांच्याबरोबर काम करता येणार नाही. महाराष्ट्र लुटण्यात, मुंबई लुटण्यात, मराठी माणसांवर अन्याय करण्यात, शिवसेना फोडण्यात, या तिघांचा फार मोठा सहभाग आहे. अशा लोकांबरोबर जाणं हे महाराष्ट्राशी बेईमानी ठरेल. आणि दुर्दैवानं राज ठाकरे अशा लोकांची भलावण करतात. त्यांच्याबरोबर राहतात. एकेकाळी आम्ही भाजपबरोबर राहिलो आहे. त्यावेळी राज ठाकरे देखील आमच्याबरोबर होते', असेही संजय राऊत यांनी म्हटले.

कुटुंब एक असतं; संजय राऊत

'ठाकरे बंधूंमध्ये आता वैचारिक मतभेदाचे दोन वेगळे प्रवाह आहेत. मात्र कुटुंब एकत्र असते. अजित पवार देखील शरद पवार यांना भेटतात. रोहित पवार देखील काका अजित पवारांना जाऊन भेटतात. पंकजा मुंडे आणि धनंजय मुंडे देखील बहीण-भाऊ एकत्र येतात. कोकणातील राणे देखील त्यांचा एक मुलगा इकडे-दुसरा तिकडे. पण कुटुंब एक असतं', असे संजय राऊत यांनी म्हटले.

राजकीय नजरेने सध्या पाहू नका

संजय राऊत यांनी महाराष्ट्राच्या दृष्टीने काही महत्त्वाचे प्रवाह असतात. त्या प्रवाहांमध्ये आम्हाला वाहत जाता येत नाही. उद्धव-राज हे दोघं भाऊ आहेत. त्यांनी हा निर्णय घ्यायचा आहे. त्यांनी घेतलेला निर्णय महाराष्ट्र मान्य करेल. परंतु कालचा लग्नसोहळा राजकीय विषय नव्हता. अनेकदा ते दोघं एकत्र आले आहेत. राजकीय नजरेने सध्या पाहू नका, असा सल्ला देखील दिला.