Nitesh Rane Vs Vaibhav Naik : मंत्री राणे स्वतः ला डॉन समजतात, अन् पोलिसांच्या चार-चार गाड्या घेऊन फिरतात; वैभव नाईकांनी थेट टार्गेट केलं

Maharashtra Politics News : शिवसेना पक्षप्रमुख उद्धव ठाकरे आणि नारायण राणे यांच्यातील राजकीय संघर्ष संपूर्ण राज्याला माहिती आहे. लोकसभा आणि विधानसभा निवडणुकीत तो शिगेला पोचला होता. विधानसभा निवडणुकीतील यशानंतर राणे पिता-पुत्रांनी शिवसेना ठाकरे पक्षाला अधिकच टार्गेट केले आहे.

पण आता सिंधुदुर्गातील ठाकरे यांचा शिलेदार माजी आमदार वैभव नाईक यांनी मंत्री राणेंना आता भिडायला सुरवात केली आहे. कणकवली शहरात पोलिस ठाण्याच्या हकेच्या अंतरावर चोरांनी चार ते पाच दुकाने फोडून केलेल्या चोरीच्या घटनेवरून टायमिंग साधत माजी आमदार नाईक यांनी मंत्री राणे यांच्यावर थेट टीका केली आहे.

भाजप (BJP) पालकमंत्री नीतेश राणे स्वतः ला डॉन समजतात. आणि ते असू शकतील. मात्र त्यांच्याच मतदारसंघात कणकवली शहरात पोलिस ठाण्याच्या हकेच्या अंतरावर असलेली चार ते पाच दुकाने चोरांनी फोडली. पालकमंत्री राणे यांच्या दौऱ्यात पोलिसांच्या चार-चार गाड्या पाठीमागे फिरतात, मग शहराच्या सुरक्षितेकडे कोण पाहणार? असा सवाल वैभव नाईक यांनी केला.

वैभव नाईक यांनी, स्वतःला डॉन समजणाऱ्या नीतेश राणेंना एवढ्या पोलिस (Police) संरक्षणाची गरज काय? असा प्रश्न केला. ते डॉन आहेत, त्यांना संरक्षणाची गरज नाही. त्यापेक्षा पोलिसांनी चोरी, घरफोडी या घटनांकडे लक्ष द्यावे, शहराचे संरक्षण देखील तितकेच गरजेचे आहे, असे म्हटले.

पालकमंत्री राणे यांच्या पाठी, कालपासूनच अर्ध पोलिस ठाणे आहे. असे असताना शहराच्या सुरक्षिततेचे काय? याचा जाब विचारण्यासाठी सोमवारी कणकवली पोलिस ठाण्यात शिवसेनेचे शिष्टमंडळ घेऊन निदर्शने करणार असल्याचा इशारा माजी आमदार वैभव नाईक यांनी दिला आहे.

कणकवली शहरात पोलिस ठाण्याच्या काही अंतरावर चार ते पाच दुकाने चोरांनी फोडली. सीसीटीव्हीमध्ये हा सर्व प्रकार चित्रीत झाला आहे. पोलिसांकडे याकडे लक्ष नाही. काही दिवसांपूर्वी ओरसच्या टोलनाक्याच्या शंभर मीटर अंतरावर महिलेचा जळलेला मृतदेह टाकण्यात आला. मग पोलिस नेमकं काय करतात? कोणाला संरक्षण देतात? असे सवाल वैभव नाईक यांनी उपस्थित केले.