Mumbai Senate Elections: मुंबई विद्यापीठाची सिनेट निवडणूक जाहीर; 10 सप्टेंबरला मतदान तर 13 सप्टेंबरला निकाल

Mumbai News: गेल्या अनेक महिन्यांपासून रखडलेल्या मुंबई विद्यापीठाच्या सिनेट निवडणुकीचा कार्यक्रम अखेर जाहीर झाला असून मुंबई विद्यापीठाच्या सिनेट निवडणुकीची लवकरच रणधुमाळी सुरू होणार आहे. येत्या 10 सप्टेंबरला मुंबईच्या विद्यापीठाची सिनेट निवडणूक पार पडणार असून 13 सप्टेंबरला या निवडणुकीचा निकाल लागणार आहे. या सिनेट निवडणुकी संदर्भातील निवडणूक अधिसूचना बुधवारी मुंबई विद्यापीठाने जारी केली आहे.

मुंबई विद्यापीठाच्या सिनेट निवडणुकीसाठी उमेदवारी अर्ज दाखल करण्याची अंतिम तारीख 18 ऑगस्ट असून उमेदवारी अर्ज छाननी प्रक्रिया 21 ऑगस्टपर्यंत असणार आहे. याबरोबरच उमेदवारी अर्ज मागे घेण्याची तारीख 25 ऑगस्ट आहे, तर 28 ऑगस्टला उमेदवारांची यादी प्रसिद्ध करण्यात येणार आहे.

तसेच 10 सप्टेंबरला सकाळी नऊ ते सायंकाळी पाच वाजेपर्यंत सिनेट निवडणुकीसाठी मतदान पार पडणार आहे. त्यानंतर 13 सप्टेंबरला या निवडणुकीचा निकाल लागणार आहे. मुंबई विद्यापीठाची सिनेट निवडणूक दहा जागांसाठी असून या दहा जागांपैकी पाच जागा खुल्या प्रवर्गासाठी आहेत. तर पाच जागा या राखीव प्रवर्गासाठी आरक्षित आहेत.

मुंबई विद्यापीठाच्या सिनेट निवडणुकीसाठी राजकीय पक्ष आणि विद्यार्थी संघटना गेल्या अनेक दिवसांपासून तयारीला लागल्या होत्या. अखेर ही निवडणूक जाहीर झाली असून या सिनेट निवडणुकीत मोठी चुरस पाहायला मिळणार आहे. तसेच या निवडणुकीत कोण बाजी मारतं, याकडे आता सर्वांचे लक्ष लागले आहे.

Edited By- Ganesh Thombare