Narendra Jadhav: महाराष्ट्रात त्रिभाषा सूत्र रद्द होणार? नरेंद्र जाधवांनी दिले संकेत; नेमका घोळ काय झाला? हे ही सांगितलं

Narendra Jadhav: राष्ट्रीय शैक्षणिक धोरणानुसार महाराष्ट्रात पहिलीपासून त्रिभाषा सूत्र रद्द होणार असल्याचे संकेत यासंदर्भातील अंमलबाजवणीसाठी तयार करण्यात आलेल्या समितीचे अध्यक्ष नरेंद्र जाधव यांनी सांगितलं आहे. त्याचबरोबर राज्यात त्रिभाषा सुत्राबाबतचा नेमका घोळ काय झाला? हे देखील त्यांनी सांगितलं आहे. एका वृत्तवाहिनीशी बोलताना त्यांनी आपल्या समितीची भूमिका स्पष्ट केली.

दोन दिवसांपूर्वी संसदेत केंद्र सरकारच्या शिक्षण विभागानं हे स्पष्ट केलं आहे की, राष्ट्रीय शैक्षणिक धोरणात भाषांची सक्ती केलेली नाही. इयत्ता पहिलीपासून तिसरी भाषा शिकणंही बंधनकारक नाही. यापार्श्वभूमीवर बोलताना नरेंद्र जाधव म्हणाले, "पहिली गोष्ट म्हणजे पहिलीपासून तीन भाषांची सक्ती असणार नाही. शैक्षणिक धोरणात हेच होतं की, कालांतरानं हळूहळू तीन भाषा शिकवण्यात येतील. आता दुसरी गोष्ट जी केंद्र सरकारनं स्पष्ट केलेली आहे ती म्हणजे हिंदी भाषा ही सक्तीची भाषा राहणार नाही, शैक्षणिक धोरणातही हे स्पष्ट होतं.

हिंदी भाषा सक्तीची असणार नाही हे स्पष्ट असतानाही माशेलकर समितीनं तो गोंधळ केला आणि हिंदी पहिलीपासून बंधनकारक केली. आता आमची समिती याचा साकल्यानं अभ्यास करणार आणि बदललेल्या तंत्रज्ञानाच्या परिप्रेक्ष्यामध्ये आणि केंद्र सरकारनं स्पष्ट केलेल्या भूमिकेच्या पार्श्वभूमीवर भाषा सूत्र कसं असावं? हे ठरवण्याचं काम करणार आहे. ही भूमिका लक्षात घेऊन दोन्हींच्या संदर्भामध्ये भाषा सुत्राचं पुनर्लेखन कसं करता येईल, याचा विचार ही समिती करणार आहे.

आयुष्यात उभं राहण्यासाठी जास्तीत जास्त मदत होईल अशा प्रकारचं भाषा सूत्र शालेय शिक्षणामध्ये आणणं हे आमच्या समितीचं ध्येय आहे आणि मी ते अत्यंत निपक्षःपातीपणे आणि अत्यंत प्रामाणिकपणे कुठल्याही दडपणाला बळी न पडता मांडणार आहे, असंही नरेंद्र जाधव यांनी सांगितलं.