Ajit Pawar: माणिकराव कोकाटेंच्या राजीनाम्यावर सोमवारी होणार फैसला? अजित पवारांनी दिले स्पष्ट संकेत

Ajit Pawar on Manikrao Kokate: विधानसभेत रम्मी खेळतानाच्या व्हिडिओ प्रकरणात आता कृषीमंत्री माणिकराव कोकाटे यांचा राजीनामा होण्याची शक्यता वर्तवली जात आहे. ज्या पक्षाचे कोकाटे हे आमदार आहेत त्या पक्षाचे प्रमुख अजित पवार यांनी आज माध्यमांशी बोलताना सूचक भाष्य केलं आहे. सोमवारी किंवा मंगळवारी आपण कोकाटे यांच्याशी बोलणार असल्याचं त्यांनी म्हटलं आहे.

अध्यक्षांकडून चौकशी सुरु

अजित पवार म्हणाले, "यासंदर्भात मला जी माहिती मिळाली त्यानुसार, कोकाटेंबाबतची घटना ही सभागृहात घडली आहे. विधीमंडळाचा जो भाग आहे, तो राम शिंदे आणि राहुल नार्वेकर यांच्या अखत्यारित येत असतो. त्यांनी देखील या प्रकरणाची चौकशी लावली आहे. कोकाटे मला अजून प्रत्यक्ष भेटलेले नाहीत, काल मी दुपारी इथं पोहोचलो. पण काल कोकाटेंनी जी पत्रकार परिषद घेतली, त्यात त्यांनी म्हटलं की मी रम्मी खेळतंच नव्हतो. माझी आणि त्यांची भेट झालेली नाही. आता बहुतेक त्यांची आणि माझी सोमवारी भेट होईल"

समोरा-समोर बोलणार मग निर्णय घेणार - पवार

"आम्ही यापूर्वीच सर्व मंत्र्यांना सांगितलं आहे की, सर्वांना भान ठेवून बोललं पाहिजे, निर्णय घेतले पाहिजेत. मागे एकदा कोकाटेंकडून एकदा अशीच घटना घडली तेव्हा मी त्याची दखल घेऊन त्यांना सांगून दिलं होतं. त्यानंतर दुसऱ्यांदा परत असंच काहीतरी घडलं होतं, त्यावेळीही मी त्यांना जाणीव करुन दिली होती की इजा झालं, बिजा झालं आता तिजा होऊ देऊ नका.

पण तिसऱ्यांदा आता याबाबतीत ते म्हणतात की मी हे करतच नव्हतो. पण चौकशीनंतर ते समोर येईलच. सोमवारी नाहीतर मंगळवारी मी त्यांच्याशी बोलून समोरा-समोर चौकशी करणार आणि त्याच्यानंतर मी काय तो निर्णय घेणार. जर यामध्ये तथ्य आढळलं तर तो निर्णय आमच्या अखत्यारित असेल मुख्यमंत्री आम्ही ठरवून तो निर्णय घेऊ. बाकी या प्रकरणात विरोधक कोण काय बोलतंय? याचं मला काही घेणं देणं नाही"

शेवटी या बाबतीत आम्ही महायुतीच्या सरकारमध्ये काम करत असताना आमच्या कुठल्याही व्यक्तीकडून किंवा कुठल्याही मंत्र्याकडून महायुतीला कुठेतरी कमीपणा येईल अशा पद्धतीच वक्तव्य कुणाकडूनच येता कामा नये, हे आम्ही सांगितलं आहे.