Dhananjay Munde : धनंजय मुंडेंना एक अन् बाकीच्यांना दुसरा न्याय का? राऊतांनी मोदींच्या दौऱ्याशी जोडले कनेक्शन

Mumbai News : पंतप्रधान नरेंद्र मोदींच्या मुंबई दौऱ्यावरून शिवसेना उद्धव बाळासाहेब ठाकरे पक्षाचे खासदार संजय राऊत यांनी निशाणा साधला आहे. या दौऱ्यात पंतप्रधान महायुतीच्या आमदारांशी संवाद साधणार आहे. यावेळी राष्ट्रवादी काँग्रेसचे मंत्री धनंजय मुंडे उपस्थित राहणार नाहीत. त्यावरून राऊतांनी धनंजय मुंडे यांना एक न्याय बाकीच्यांना दुसरा न्याय असे का, असा सवाल केला आहे.

मस्साजोगचे सरपंच संतोष देशमुख हत्याप्रकरणी धनंजय मुंडे यांच्यावरही गंभीर आरोप होत आहेत. सध्या मुंडे हे परळीत असल्याचे सांगितले जात आहे. त्यावरून राऊत म्हणाले, मुंडे यांना दूर ठेवण्यात आले आहे की नाही माहीत नाही, पण असे अनेक मंत्री आहेत, ज्यांच्यावर पंतप्रधानांनी आरोप केले होते. मग त्यांना पण दूर ठेवणार का? असा सवाल राऊतांनी केला आहे.

धनंजय मुंडे यांना मंत्रिमंडळातून काढत नाही, तोपर्यंत हे काही करून फायदा नाही. ज्यांच्यावर शिंतोडे उडाले ते अजून मंत्रिमंडळात आहेत, आकाच्या आकावर कारवाई कधी होणार, अशी टीका राऊतांनी केली. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार पक्षाचे अध्यक्ष शरद पवार यांनी केंद्रीय गृहमंत्री अमित शाह यांच्या टीकेला मंगळवारी प्रत्युत्तर दिले. त्यावरही राऊतांनी भाष्य केले.

राऊत म्हणाले, शरद पवारांनी एक माहिती दिली आहे. ते जो प्रसंग सांगत आहेत, अमित शाह हे त्यावेळेचे गुजरात दंगलीचे बरखास्त गृहमंत्री होते. मी देखील त्यांना अनेक वेळा अरुण जेटली यांच्या संसदेच्या कार्यालयाबाहेर बसलेले बघितले आहे. ज्यांनी मदत केली त्याच कुटुंबाच्या पाठीत खंजीर खुपसण्याचा काम त्यांनी केल्याची टीका राऊतांनी केली.

काही गोष्टी मला देखील माहीत आहेत. पण मी गुप्तता बाळगणारा माणूस आहे, काही गोष्टी या सांगायच्या नसतात. बाळासाहेबांनी मोदींना देखील मदत केली आहे, त्यांना मुख्यमंत्री पदावरून काढताना बाळासाहेब हे त्यांच्या मागे ठामपणे उभे होते. असेच काहीतरी अमित शाह यांच्या बाबतीत झाले असेल, त्याशिवाय पवारसाहेब असेल बोलणार नाहीत, असे राऊतांनी स्पष्ट केले.