Nagpur Violence: कोरटकर तुमच्या जवळचा आहे का? राजे मुधोजी भोसले यांचा हिंदुत्ववादी संघटनांना सवाल

नागपूर : औरंगजेबाची कबर उध्वस्थ करण्यासाठी विश्वहिंदू परिषद आणि बजरंग दलाच्या आंदोलनामुळे नागपूरमध्ये दंगल उसळली होती. अजून शहरात तणावाची स्थिती आहे. अनेक भागात संचारबंदी आहे.

सध्या परिस्थिती नियंत्रणात असून सर्वच नेत्यांनी शांततेचे आवाहन केले आहे. दंगल नेमकी कशी उसळली याचा शोध पोलीस घेत आहेत. यापार्श्वभूमीवर राजे मुधोजी भोसले यांनी जळजवळीत प्रतिक्रिया व्यक्त करून विश्वहिंदू परिषद व बजरंग दलाच्या डोळ्यात अंजन घातले आहे.

राजे मुधोजी म्हणाले, "औरंगजेबाची कबर उध्वस्त करण्याच्या विश्व हिंदू परिषद आणि बजरंग दलाच्या मोहिमेला आमचा विरोध नाही. मात्र अखंड हिंदुस्तानाचे दैवत छत्रपती शिवाजी महाराज, छत्रपती संभाजी महाराज व राजमाता जिजाऊ मॉ साहेबाच्या बाबतीत गरळ ओकणाऱ्या व जातीय तेढ निर्माण करणाऱ्या प्रशांत कोरटकर प्रकरणात तुम्ही गप्प का बसला होता. कोरटकर अवमान करतो व आपण गप्प बसता. हा मुद्दा तर आपण लावून धरला पाहिजे होता. परंतु छत्रपतींचा अपमान होतो व हिंदुत्ववादी संघटना सहन करतात याचे कारण काय?

कोरटकर तुमच्या जवळचा आहे का? असा सवाल राजे मुधोजी भोसले यांनी हिंदुत्ववादी संघटनांना केला आहे. आपल्या मोहिमेला आम्ही पाठींबा देतो. परंतु कोरटकर प्रकरणावरून महाराष्ट्राचे लक्ष भरकटू देऊ नका. आपल्याकडून समस्त हिंदुस्थानातील अठरापगड जाती, बारा बलुतेदार, हिंदुंना ही अपेक्षा होती की, औरंगजेब कबर मोहिमेप्रमाणे कोरटकरला शिक्षा झाली पाहिजे. यासाठी आपण मोहीम राबविली असती तर अधिक आनंद झाला असता, असेही राजे मुधोजी भोसले यांनी म्हटले आहे.

नागपूरचे पालकमंत्री व भाजपचे प्रदेशाध्यक्ष चंद्रशेखर बावनकुळे यांनी घटनास्थळी भेट देऊन सर्वांचा शांततेचे आवाहन केले आहे. ज्यांनी जोळपोळ व तोडफोड केली त्यांच्या विरोधात गुन्हे दाखल करण्याचे आदेश त्यांनी दिले आहे. जखमी पोलीस आणि फायर ब्रिगेडच्या जवानांची पालकमंत्र्यांनी भेट घेतली. ज्या भागात दंगल उसळली त्या परिसरात हिंदू आणि मुस्लिम समाज मोठ्या प्रमाणात राहतात. या घटनेमुळे मात्र आपसातील वैर वाढले असल्याचे दिसते.