BJP vs Shivsena Mayor Election Politics : महापालिकेच्या इतिहासात प्रथमच महापौरपद अनुसूचित जमाती प्रवर्गासाठी आरक्षित झाल्याने राजकीय गणितांना वेग आला आहे. या प्रवर्गातून निवडून आलेले शिवसेनेचे दोन शिलेदार शर्यतीत असले, तरी मनसेच्या शीतल मंढारी यांच्या रूपाने तिसरा पर्याय समोर आल्याने सत्तेचा सस्पेन्स वाढला आहे.
महापौरपदासाठी शिवसेनेकडे दोन प्रबळ दावेदार आहेत, मात्र दोघांचीही जमेची बाजू वेगळी आहे. दुसऱ्यांदा निवडून आलेल्या हर्षाली थवील यांच्याकडे पालिकेच्या प्रशासकीय कामाचा दांडगा अनुभव आहे. वडवली- अटाळी परिसरात 7 कोटींची विकासकामे आणि महासभेतील त्यांचा आक्रमक वावर यामुळे त्या प्रबळ दावेदार मानल्या जात आहेत.
तर कल्याण पश्चिम शहरप्रमुख रवी पाटील यांचे कट्टर समर्थक असलेले किरण भांगले यांनी पहिल्याच प्रयत्नात विजय मिळवला आहे. उच्चशिक्षित आणि तरुण चेहरा असलेल्या किरण यांच्या रूपाने आपल्या कार्यकर्त्याला न्याय मिळावा, असा रवी पाटील यांचा प्रयत्न असेल. मनसेने शिवसेनेला पाठिंबा जाहीर केल्यामुळे सत्तेच्या वाटाघाटीत मनसेचा शब्द महत्त्वाचा ठरणार आहे.
दुसऱ्या बाजूला मनसेच्या शीतल मंढारी यांनी शिवसेनेच्या उमेदवाराचा पराभव करून विजय मिळवला आहे. पाठिंबा देताना मनसेने विकासासोबतच सत्तेतील पदांबाबतही काही 'बोलणी' केली असल्याची चर्चा आहे. त्यामुळे मनसेला खुश करण्यासाठी शीतल मंढारी यांच्या गळ्यात महापौरपदाची माळ पडू शकते.
शिवसेनेच्या खेळीमुळे महापौरपद भाजपच्या हातातून जवळपास निसटले आहे. शिंदेंच्या खेळीला प्रत्युत्तर देण्यासाठी भाजप आता वेगळ्या रणनीतीवर विचार करत आहे. शिवसेनेचे वर्चस्व कमी करण्यासाठी भाजप शीतल मंढारी यांच्या नावाचा आग्रह धरू शकते. भाजपचा अप्रत्यक्ष पाठिंबा शीतल मंढारी यांना मिळाल्यास त्या महापौरपदाच्या शर्यतीत सर्वात पुढे येऊ शकतात.
निवडणुकीपूर्वी शीतल यांनी शिवसेना उद्धव बाळासाहेब ठाकरे पक्षातून भाजपमध्ये प्रवेश केला होता. पण उमेदवारीत डावलल्याने त्यांनी ऐनवेळी मनसेकडून निवडणूक लढवली. पण विजयानंतरही त्यांनी भाजप आमदार सुलभा गायकवाड यांची भेट घेतली होती. थोडक्यात मनसेचे संख्याबळ अगदी एका आकड्यात असलेल्या मनसेला महापौरपदाची संधी मिळण्याची शक्यता वाढली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.