Rohit Pawar: अजित पवार म्हणजे KGF मधील रॉकीभाई! रोहित पवारांनी उधळली स्तुतीसुमनं

Rohit Pawar: पुणे, पिंपरी-चिंचवड महापालिकेमध्ये अजित पवारांची राष्ट्रवादी आणि शरद पवारांची राष्ट्रवादी हे दोन्ही पक्ष एकत्र आले आहेत. दोन्ही महापालिकांमध्ये त्यांच्या नेत्यांचा जोरदार प्रचार सुरु आहे. पिंपरी-चिंचवडमध्ये नुकत्याच पार पडलेल्या प्रचार सभेत बोलताना रोहित पवारांनी अजित पवारांचा उल्लेख KGF सिनेमातील रॉकीभाई असा केला. रॉकीभाई ज्या प्रकारे सर्वसामान्यांसाठी काम करतो तशीच काम अजित पवारांकडून होत असल्याचं त्यांनी म्हटलं आहे.

रोहित पवार म्हणाले, भाजपला वाटतं महानगरपालिकेत आमची अशीच सत्ता राहील. मग तिथं आम्ही आमच्या कार्यकर्त्यांसोबत चर्चा केली, सर्व पदाधिकाऱ्यांशी आम्ही चर्चा केली. त्यांनी आम्हाला सांगितलं की इथली सामान्य जनता त्रस्त आहे. त्यामुळं भाजपच्या दोन घमंडी गरुडांना घरी बसवायचं असेल तर आपल्याला एकत्र यावं लागेल, या कार्यकर्त्यांची ही इच्छा आम्ही नेत्यांना सांगितलं. त्यानंतर आपण निर्णय घेतला की या महापालिकेच्या भवितव्यासाठी पूर्वी जे काही आमचे विषय झाले असतील ते सर्व विसरायचे आणि सामान्य लोकांसाठी एकत्र यायचं.

त्यामुळं केजीएफमध्ये जो हिरो होता त्याच्या हिरोचं नाव होतं रॉकी. या रॉकीची भूमिका काय असायची सामान्य लोकांच्या हितासाठी जी काही ताकद असेल ती एक करायची आणि गरुडाला घरी बसवाचं. त्यामुळं राजकीय दृष्टीकोनातून गरुडाला आपण घरी बसवायचं आणि ते देखील लोकशाहीच्या माध्यमातून. त्यामुळं या निवडणुकीत तुमच्यावतीनं भूमिका मांडताना आपली रॉकी कोण तर दादा हे फक्त आपण लक्षात ठेवायचं.

२०१७ मध्ये पिंपरी-चिंचवडचा जाहीरनामा भाजपनं आणला होता त्यात २० ते २२ मुद्दे होते, त्यातील एकही मुद्दा यांनी पूर्ण केला नाही. तर भाजपच्या नेत्यांनी इथं फक्त आपली घरं भरली. त्यांच्या भागात छत्रपती संभाजी महाराजांचं स्मारक आहे त्यातही या लोकांनी पैसे खाल्ले. अशा विचाराचे लोक येतील, धमकी देतील पण घाबरायचं नाही आणि सत्ता आपल्या विचारांची आणायची असं आवाहन यावेळी रोहित पवारांनी केलं.