Rohit Pawar : रोहित पवारांनी स्पष्टच सांगितलं; सुनेत्रा काकींविरोधात नव्हे, अजितदादांविरोधात बोलणार...

Pimpri Chinchwad Political News : बारामती लोकसभेसाठी काकी विरुद्ध आत्या अशी लढत झालीच तर आम्ही सुनेत्रा काकींविरोधात बोलणार नाही. कारण त्या राजकारणात नव्हत्या. बारामतीत खरी लढत ही सुप्रियाताई विरुद्ध अजितदादा अशी होणार आहे, म्हणून आम्ही अजितदादांविरोधातच बोलू, असे स्पष्ट मत राष्ट्रवादी काँग्रेसचे (शरदचंद्र पवार) आमदार रोहित पवार यांनी व्यक्त केले.

बारामती लोकसभा मतदारसंघात पवार कुटुंबातील सदस्यांतच लढत होण्याची शक्यता आहे. यावेळेस खासदार सुप्रिया सुळेंच्या विरोधात उपमुख्यमंत्री अजित पवार (Ajit Pawar) यांची पत्नी सुनेत्रा पवार (Sunetra Pawar) या रिंगणात उतरणार आहेत. त्यामुळे या प्रतिष्ठेच्या लढतीत कोण बाजी मारणार याची उत्सुकता आहे. या पार्श्वभूमीवर शरदचंद्र पवार गट राष्ट्रवादीचे आमदार रोहित पवार यांनी सूचक विधान केले आहे.

ते म्हणाले, बारामती लोकसभेत काकी विरुद्ध आत्या अशी लढत झालीच, तर आम्ही सुनेत्रा काकींविरोधात बोलणार नाही. कारण त्या आत्तापर्यंत राजकारणात नव्हत्या. त्यांनी केवळ समाजसेवा केली आहे. त्यामुळं बारामतीत खरी लढत ही सुप्रियाताईंविरुद्ध अजितदादा अशी लढत होणार आहे. त्यामुळे आम्ही अजितदादांविरोधात बोलू, असे त्यांनी स्पष्ट केले.

बारामतीत मतांचे विभाजन टाळण्यासाठी युगेंद्र पवार यांना रिंगणात उतरविले जाणार आहे. यावर रोहित पवार म्हणाले, याबाबत शरद पवारसाहेब म्हणतील तसं होणार आहे. युगेंद्र पवार (Yugendra Pawar) यांचं स्वागत करायला हवं. आमच्यासारख्या बच्चाला हे कळतंय, साहेबांना साथ देण्याची गरज आहे, असेही त्यांनी सांगितलं.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, शिरूर मतदारसंघाबाबत रोहित पवार (Rohit Pawar) यांना छेडले असता ते म्हणाले, मी पुन्हा येईन नंतर आता अमोल कोल्हे यांना पाडणार असं अजित पवार म्हणतात. पण, आता कोल्हे विरोधात पार्थ पवारही असू शकतो.

मुळात अजितदादांना महायुतीत चार जागा मिळतील, त्यात शिरूर लोकसभा मिळायची नाही, असेही भाकीत त्यांनी केले. आजच्या सभेबाबत शरद पवारसाहेब काय बोलतील हे कोणी सांगू शकत नाही. त्यामुळं आजच्या सभेत ते काय बोलतील याची उत्सुकता आहे, असेही त्यांनी स्पष्ट केले.

Edited By : Umesh Bambare

R