Teacher recruitment : शिक्षक पदभरतीबाबत महत्वाची बातमी; शिक्षण आयुक्तांच्या ‘त्या’ पत्रानंतर परीक्षा परिषदेवर मोठी जबाबदारी

MSCE teacher recruitment : शिक्षक पदभरतीबाबत राज्य सरकारने महत्वपूर्ण निर्णय घेतला आहे. आतापर्यंत पवित्र पोर्टलमार्फत शिक्षक भरती करण्याची जबाबदारी शिक्षण आयुक्त कार्यालयाकडे होती. मात्र, आयक्तांनी काही दिवसांपूर्वीच राज्य सरकारला पत्र पाठवून ही जबाबदारी अन्य कार्यालयावर सोपविण्याची विनंती केली होती. त्यानुसार सरकारने मोठा निर्णय घेतला आहे.

शालेय शिक्षण विभागाने याबाबतचा शासन निर्णय आज जारी केला आहे. शिक्षक अभियोग्यता व बुध्दीमत्ता चाचणी २०२५ नुसार तसेच यापुढील काळात पवित्र पोर्टलमार्फत राज्य स्तरावरील शिक्षक पदभरतीशी संबंधित सर्व कामकाज महाराष्ट्र राज्य परीक्षा परिषदेकडे सोपविण्यात आले आहे. त्यासाठी एक सुकाणू समितीही स्थापन करण्यात आली असून या समितीच्या मार्गदर्शनाखाली परिषदेकडून काम केले जाईल, असे शासन निर्णयात स्पष्ट करण्यात आले आहे.

का घेतला हा निर्णय?

शिक्षण आयुक्तांच्या १९ ऑक्टोबरच्या पत्राचा संदर्भ देत शासन निर्णयात म्हटले आहे की, शिक्षण आयुक्त हे शालेय शिक्षण विभागांतर्गत क्षेत्रीय स्तरावरील प्रमुख प्रशासकीय कार्यालय आहे. शालेय शिक्षण विभागाने निश्चित केलेल्या सर्व धोरणांची व घेतलेल्या सर्व निर्णयांची अंमलबजावणी करण्यासाठी आवश्यक उपाययोजना, देखरेख व नियंत्रण ही या कार्यालयाची प्रमुख जबाबदारी आहे.

शिक्षण आयुक्त कार्यालयावर शिक्षक पदभरतीची जबाबदरी असून ती वेळखाऊ प्रक्रिया आहे. कार्यालयाच्या बहुतांश वेळ पदभरतीशी संबंधित कामांसाठीच खर्च होत आहे. परिणामी इतर महत्वाच्या धोरणांच्या व निर्णयांच्या अंमलबजावणीवर त्याचा काहीसा विपरित परिणाम होत आहे, असे शासन निर्णयात नमूद करण्यात आले आहे.

परीक्षा परिषदेकडेच का जबाबदारी?

महाराष्ट्र राज्य परीक्षा परिषद या संस्थेमार्फत शिक्षक पात्रता परीक्षा, शिक्षक अभियोग्यता व बुध्दीमत्ता चाचणी यासारख्या परीक्षांचे आयोजन केले जाते. शिवाय भरतीशी संबंधित कामकाज या संस्थेने यापूर्वी हाताळले आहे. पदभरतीशी संबंधित परीक्षेचे आयोजन व निवड प्रक्रिया एकाच संस्थेकडे असणे आवश्यक असून तशी व्यवस्था अंमलात आणण्यासाठी हा निर्णय घेण्यात आल्याचे शिक्षण विभागाने स्पष्ट केले आहे.

सुकाणू समितीत कोण-कोण?

शिक्षण आयुक्त हे सुकाणू समितीचे अध्यक्ष असतील. तर परीक्षा परिषदेचे अध्यक्ष, महाराष्ट्र राज्य शैक्षणिक संशोधन व प्रशिक्षण परिषदेचे संचालक, माध्यमिक व उच्च माध्यमिक शिक्षण संचालक, प्राथमिक शिक्षण संचालक हे या समितीचे सदस्य असतील. परीक्षा परिषदेच्या आयुक्तांकडे सदस्य-सचिव पदाची जबाबदारी असेल.