Maratha Reservation : तिकडे जरांगेंचा आझाद मैदानातून न निघण्याचा निर्धार अन् इकडे फडणवीस सरकारने मराठा समाजाबाबत घेतला मोठा निर्णय!

Mumbai News, 30 Aug : तिकडे मुंबईतील आझाद मैदानात मनोज जरांगे पाटलांनी मराठा समाजाच्या आरक्षणासाठी बेमुदत उपोषण सुरु केलं आहे. त्यांच्या आंदोलनासाठी राज्यभरातील मराठे मुंबईत जमा होत असतानाच इकडे आता राज्य सरकारने मराठा समाजा संदर्भात एक मोठा निर्णय घेतल आहे.

राज्यातील मराठा समाजातील पात्र व्यक्तींना कुणबी, मराठा-कुणबी व कुणबी-मराठा जातीचे जात प्रमाणपत्र व जात वैधता प्रमाणपत्र देण्यासाठी तालुकास्तरावर तहसिलदारांच्या अध्यक्षतेखाली गठीत वंशावळ समितीस शासनाने 30 जून 2026 पर्यंत मुदतवाढ दिली आहे.

याबाबतचा शासन निर्णय सामाजिक न्याय व विशेष सहाय्य विभागाने निर्गमित केल्याची माहिती सामाजिक न्याय मंत्री संजय शिरसाट यांनी दिली आहे. त्यामुळे सरकारकडून मराठा समाजाला मोठा दिलासा दिल्याचं दिसत आहे.

सामाजिक न्याय व विशेष सहाय्य विभागाच्या 25 जानेवारी 2024 रोजीच्या शासन निर्णयानुसार ही समिती गठीत करण्यात आली होती. मात्र, या समितीचा कार्यकाळ वाढवून 31 डिसेंबर 2025 पर्यंत करण्यात आला होता.

त्यानंतर तालुकास्तरीय वंशावळ समितीस उच्चस्तरीय समितीच्या मुदतवाढीपेक्षा किमान सहा महिने अधिक मुदत देण्याचा विचार शासनाकडून करण्यात आला होता. त्यानुसार, आता या समितीचा कार्यकाळ 30 जून 2026 पर्यंत वाढविण्यात आला आहे.

शिवाय या समितीस 25 जानेवारी 2024 च्या शासन निर्णयातील सर्व तरतूदी लागू राहणार असल्याचंही शासन आदेशात स्पष्ट करण्यात आलं आहे. त्यामुळे आता सरकारने मराठा समाजाच्या प्रश्नांची दखल घ्यायला सुरूवात केल्याचं पाहायला मिळत आहे.

दरम्यान, मराठा आरक्षण आंदोलनासाठी मुंबईत हजारोंच्या संख्येने मराठा बांधव आले आहेत. तर कालपासून आणखी काही मराठा आंदोलक मुंबईत येत आहेत. सरकारने त्यांची पुरेशी सोय केली नसल्याचा आरोप आंदोलक करत आहेत. तर जरांगे पाटील यांनी देखील सरकारविरोधात आक्रमक भूमिका घेतली आहे. त्यामुळे आता सरकारकडून मराठ्यांना खुश करण्यासाठी आणि त्यांचा रोष कमी करण्यासाठी हालचाली सुरू झाल्याचं बोललं जात आहे.