Mhada: म्हाडाच्या मास्टर लिस्टमध्ये मोठा घोटाळा! रहिवाशांविरोधात पोलिसांत गुन्हा दाखल

Mhada: म्हाडाच्या मास्टर लिस्टमध्ये बनावट नावं घुसवणाऱ्या रहिवाशांविरोधात खेरवाडी पोलीस ठाण्यात गुन्हा दाखल करण्यात आला आहे. पण यामध्ये म्हाडाच्या अभियंत्यांवर मात्र गुन्हा दाखल झालेला नाही त्यामुळं त्यांच्यावर कधी कारवाई होणार? असाही सवाल विचारला जात आहे. म्हाडाच्या मास्टर लिस्टमध्ये बनावट नावे घालून सदनिकांचा लाभ घेण्याचा प्रकार दक्षता विभागाच्या चौकशीत उघड झाला आहे.

या फसवणुकीप्रकरणी खेरवाडी पोलीस ठाण्यात १९ बनावट रहिवाशांविरोधात फसवणुकीचा गुन्हा दाखल झाला आहे. मात्र, या नागरिकांची नावं मास्टर लिस्टमध्ये बनावट पद्धतीनं घुसवणाऱ्या म्हाडा अभियंत्यांवर मात्र अद्यापही गुन्हा दाखल झालेला नाही. यामुळं त्यांच्यावर कारवाई होणार का? असा प्रश्न आता उपस्थित झाला आहे.

सुरेश चिकणे यांच्या यादीत १५ बनावट नावे आढळून आली असून, १३ जणांनी प्रत्यक्ष सदनिका मिळवल्या. मूळ यादीत नसलेल्या नावांना पात्र ठरवून गाळे देण्यात आले. मात्र, ही नावे कशी आणि कोणाच्या मर्जीने यादीत आली, याचा ठोस उल्लेख नसून संबंधित अधिकाऱ्यांवर थेट कारवाईचा उल्लेख नाही.

बनावट यादी, मूळ दस्तऐवजांची न पडताळलेली छाननी आणि समितीच्या हलगर्जीपणामुळं शासनाची फसवणूक झाली आहे, हे चौकशीत स्पष्ट झाले असले तरी यामागील अधिकारी व जबाबदार व्यक्तींना पाठीशी घालण्यात आले आहे का, असा प्रश्न निर्माण होतो आहे.