पिंपरीच्या धर्तीवर पुण्यात सलग ७५ तास लसीकरण मोहीम

सरकारनामा ब्यूरो

पुणे : पुणे जिल्ह्यातील कोरोना संसर्ग पुर्णपणे नियंत्रणात आला आहे. कोरोना लसीकरणाचा फायदा होत आहे. त्यामुळे पिंपरी-चिंचवडच्या धर्तीवर पुणे शहर व जिल्ह्यात सलग ७५ तासाची (तीन दिवस तीन तीस) खास लसीकरण मोहीम राबविण्याची घोषणा पालकमंत्री अजित पवार (Ajit Pawar) यांनी आज केली. 75 hours continuous vaccination campaign in Pune on the lines of Pimpri)

पिंपरीत गेल्या दोन दिवसांपासून सलग ७५ तासांची लसीकरण मोहीम सुरू आहे. या माहिमेत शुक्रवारी सायंकाळी पाच वाजेपर्यंत (३१ तास) साडेपाच हजार जणांचे लसीकरण झाले आहे. या धर्तीवर लसीकरण करण्यासाठी पुणे महापालिका व जिल्हा परिषदेच्या आरोग्य विभागाला तयारी करण्यास सांगण्यात आल्याचे पालकमंत्री पवार यांनी सांगितले.

शहर व जिल्ह्यातील शाळा येत्या चार ऑक्टोबरपासून सुरू करण्यात येणार आहेत. यासाठी जिल्ह्याच्या ग्रामीण भागातील पालकांची त्यांच्या पाल्यांना शाळेत पाठवण्याची मानसिकता झाली आहे. मात्र, शहरातील बहुतांशी पालकांची त्यांच्या पाल्यांना शाळेत पाठवण्याची मानसिकता झालेला नाही, असे शाळांनी पालकांकडून मागविलेल्या संमतिपत्रांच्या माध्यमातून स्पष्ट होत आहे, असे पवार यांनी सांगितले.

सरकारच्या मार्गदर्शक सुचनांनुसार शाळांनी पूर्ण पुर्वतयारी व नियोजन केले आहे. त्यांनी आपापल्या परीने काही शाळांनी आठवड्यातील तीन, काहींनी दोन तर, काहींनी पाच दिवस ऑफलाइन शाळेचे नियोजन केले आहे.दरम्यान, काही पालकांनी आता दिवाळी जवळ आली आहे. शाळांना दिवाळीची सुट्टी लागणार आहे. मग आता घाई कशाला, दिवाळीनंतर बघू, अशी बहुतांश पालकांची मानसिकता असल्याचे पवार यांनी सांगितले.

आता कोरोना संसर्ग कमी झाला आहे. लसीकरणही बऱ्यापैकी झाले आहे. त्यामुळे आता कोरोना संपला, या भ्रमात राहून कोरोना नियम पाळणे टाळू नका. कोरोनाचा धोका अजूनही टळलेला नाही. त्यामुळे मास्कचा नियमित वापर, पुरेसे अंतर राखणे आणि सॅनिटायझरचा वापर आदी नियमांचे काटेकोरपणे पालन करावे, असे आवाहन पालकमंत्री पवार यांनी पुणेकरांना केले आहे.