Ajit Pawar Hinjawadi Sarpanch Clash : "विकासकामांना विरोध नाही पण ते फक्त आयटीवाल्यांचं..."; अजितदादांनी झापलेल्या हिंजवडीच्या सरपंचांनी अखेर आपली बाजू मांडलीच

Pune News, 02 Aug : राज्याचे उपमुख्यमंत्री तथा पुण्याचे पालकमंत्री अजित पवार यांनी नुकतंच काही दिवसांपूर्वी भल्या पहाटे हिंजवडी येथील विविध विकासकामांची पाहणी केली होती. यावेळी त्यांचा आणि हिंजवडी ग्रामपंचायतचे सरपंच गणेश जांभुळकर यांचा एक व्हिडिओ चांगलाच व्हायरल झाला होता.

या व्हिडिओमध्ये त्यांनी सरपंचांना चांगलंच सुनावलं होतं. "धरण करताना मंदिर जातातच की नाही. तुम्हाला सांगायचं ते सांगा मी ऐकून घेतो, पण मी काय करायचं तेच करतो. आपलं वाटोळं झालंय, हिंजवडीचं सगळं आयटी पार्क बाहेर चाललाय, बेंगलोरला हैदराबादला पण तुम्हाला त्याचं काय तुम्हाला पडलं नाही"; अशा शब्दात त्यांनी सरपंचांना झापलं होतं.

अजित पवारांच्या या वक्तव्यावर आणि व्हायरल व्हिडिओवर हिंजवडीचे सरपंच गणेश जांभुळकर यांनी भूमिका स्पष्ट केली आहे. ते म्हणाले, अजितदादांच्या विकासकामांना आमचा विरोध नाही, पण ते आम्हाला विचारात घेऊन काम करत नाहीत. ते आयटीवाल्याचं ऐकतात, आम्हाला बैठकीला बोलावत नाहीत", असा आरोप जांभुळकरांनी केला.

तसंच यावेळी त्यांनी सांगितलं की, मी अजितदादांकडे गावातील विविध प्रश्न मांडण्यासाठी गेलो होतो. छत्रपती शिवाजी चौक ते डांगे चौक आणि वाकड चौक, या रस्त्यांचे रुंदीकरण कमी करावं अशी मागणी आम्ही केली होती. कारण तिथे आमच्या शाळा, ग्रामपंचायती आणि काही घरे शिवाय स्मशानभूमी आहे, त्यामुळे मी त्या दिवशी दादांना रस्त्याचं रुंदीकरण कमी करावी अशी विनंती करायला गेलो होतो.

मात्र, त्यावेळी तिथे शाब्दिक झालं पण ते काय रागवले नाहीत, थोडा गैरसमज झाला आणि त्याचा व्हिडिओ सगळीकडे व्हायरल झाला. मात्र, त्यानंतर अजितदादांनी सांगितलं की, मी कोणावर रागवलो नाही. आम्ही दादांना भेटायला पुन्हा वेळ मिळत नाही म्हणून पहाटे पाचला जाऊन थांबलो होतो.

गावच्या प्रश्नांसाठी तिथे आम्ही गेलो होतो. दादा आम्हाला विश्वासात घेत नाहीत. त्यांना आयटीएन्स वेगळं सांगतात, दादा त्यांचं ऐकतात, ग्रामपंचायत विकासाच्या आड येते असा दादांच्या मनात आमच्याबद्दल चुकीचा मेसेज गेला असल्याचंही ते यावेळी म्हणाले. दरम्यान, हिंजवडीच्या रस्त्यांविषयी योग्य मार्ग काढला नाहीतर आम्हाला न्यायालयात जावं लागेल असा इशारा देखील सरपंचांनी यावेळी दिला.