Ajit Pawar : उपमुख्यमंत्री अजितदादांनी इशारा देताच सुपेकरांसोबतच अमिताभ गुप्तांच्या अडचणी वाढल्या

Pune News : पुण्यातील विवाहिता वैष्णवी हगवणेच्या मृत्यूनंतर पोलसांनी कारवाई करण्यास सुरु केली आहे. हगवणे कुटुंबातील पाच जणांना अटक करण्यात आल्यानंतर त्यांना मदत करणाऱ्यावर कारवाईचा फास आवळण्यात येत आहे. पैशांच्या हव्यासापोटी सूनेला आत्महत्या करण्यास भाग पाडणाऱ्या मुळशीतील हगवणे कुटुंबीयांचे नातेवाईक असणारे पोलीस अधिकारी जालिंदर सुपेकर यांच्यावर कारवाई करत त्यांची बदली करण्यात आली होती.

त्यानंतर आता पोलीस अधिकारी जालिंदर सुपेकर व तत्कालीन पोलीस आयुक्त अमिताभ गुप्ता यांनीही मोठ्या प्रमाणावर शस्त्र परवाने दिल्याची माहिती समोर आली आहे. त्यानंतर उपमुख्यमंत्री अजित पवार यांनी थेट इशारा देताच सुपेकरांसोबतच अमिताभ गुप्तांच्या अडचणी वाढल्या आहेत.

वैष्णवी हगवणे मृत्यू प्रकरणानंतर अनेक संशयास्पद अधिकाऱ्यांची नावे पुढे येत आहेत. पोलीस अधिकारी जालिंदर सुपेकर यांच्यानंतर आता तत्कालीन पोलीस आयुक्त अमिताभ गुप्ता यांनीही मोठ्या प्रमाणावर शस्त्र परवाने दिल्याचे समजते. या पार्श्वभूमीवर उपमुख्यमंत्री आणि बीड जिल्ह्याचे पालकमंत्री अजित पवार (Ajit Pawar) यांनी बीड जिल्ह्यातील अशा बेकायदेशीर शस्त्र परवाने प्रकरणाचा आढावा घेतला आहे.

पुण्यात शस्त्र परवाने देताना अनेक वेळा गरज नसलेल्या व्यक्तींनाही परवाने दिले गेले आहेत. काही प्रकरणांमध्ये शस्त्र परवाना नाकारल्यानंतरही राजकीय ओळख वापरून परवाना मिळवला गेला. अशा सर्व प्रकरणांची चौकशी करून योग्य ती कठोर कारवाई केली जाईल, असे अजित पवारांनी स्पष्ट केले आहे.

पुण्यात जसे काही शस्त्र परवाने रद्द करण्यात आले, त्याचप्रमाणे बीड जिल्ह्यातही गरज नसलेल्या शस्त्र परवान्यांवर कारवाई करण्यात आली आहे. पुण्यातील प्रकरणांची गंभीरता पाहता खबरदारीचा उपाय म्हणून बीडमध्येही असे परवाने रद्द करण्यात आले, असे अजित पवार यांनी स्पष्ट केले.

वैष्णवी हगवणे प्रकरणात हुंडाबळी, कौटुंबिक अत्याचार, बेनामी संपत्ती, आणि बड्या अधिकाऱ्यांच्या हस्तक्षेपातून केलेले गैरकारभार यासारख्या अनेक गोष्टी आता उघड होत आहेत. या प्रकरणात राष्ट्रवादी काँग्रेसशी संबंधित हगवणे कुटुंबीय, तसेच जालिंदर सुपेकर आणि अमिताभ गुप्ता यांचा सहभाग समोर आला आहे.

अमिताभ गुप्ता यांनी पोलीस आयुक्त असताना ५०० ते ५५० शस्त्र परवाने दिल्याची माहिती आहे. या सर्व परवान्यांची सखोल चौकशी सुरू असून पुनर्रिव्ह्यू करून अवैध परवाने रद्द करण्याचे आदेश दिले गेले आहेत. त्यामुळे अमिताभ गुप्ता यांच्यासमोरील अडचणी वाढल्या आहेत.

वैष्णवी हगवणे प्रकरणात सतत जालिंदर सुपेकर यांच्यावर गंभीर आरोप होताना दिसत आहेत. कसपटे कुटुंबियांनी थेट जालिंदर सुपेकर यांच्या पत्नीच्या नावाने पैसे पाठवल्याचेही पुढे आले. दरम्यान, वैष्णवी हगवणे आत्महत्या प्रकरणाशी संबंध आढळून आल्यानंतर गृह विभागाने जालिंदर सुपेकर यांच्यावर कारवाई केली होती. जालिंदर सुपेकर हे सध्या विशेष पोलीस महानिरिक्षक कारागृह व सुधार सेवा या पदावर कार्यरत होते. आता तिथुन त्यांची बदली पदावनती करुन उप महासमादेशक होमगार्ड या पदावर पाठवण्यात आले होते.