Ajit Pawar On Pune Loksabha: प्रशांत जगतापांना अजितदादांनी दिल्या शुभेच्छा; पुण्याच्या जागेबाबत सूचक विधान

Pune News: पुण्याचे खासदार गिरीश बापट यांचे नुकतेच निधन झाले आहे. त्या जागी कोण खासदार होणार ? याबाबत सर्व पक्षामध्ये चर्चा सुरु आहे. काही इ्च्छुक गुडघ्याला बाशिंग बांधून बसले आहेत. पुण्याचे भावी खासदार म्हणून शहरात काही नेत्यानी फलकबाजी सुरु केली आहे.

यावरुन राष्ट्रवादीचे नेते, राज्याचे विरोधीपक्षनेते अजित पवार यांनी या 'भावी खासदारांना" मिश्किलपणे टोला लगावला. या जागेवर काँग्रेसकडून आधीच दावा करण्यात आला आहे. मात्र, राष्च्रवादीकडून अद्याप अधिकृत, ठोस भाष्य कोणी केले नव्हते. या पार्श्वभूमीवर पवार यांनी प्रतिक्रिया दिली आहे. (Latest Maharashtra News)

राष्ट्रवादी काँग्रेसचे पुणे शहराध्यक्ष प्रशांत जगताप यांचा वाढदिवस नुकताच झाला, यानिमित्ताने त्यांना शुभेच्छा देतानांचे फलक झळकले होते. या फलकावर जगताप यांचा 'पुण्याचे भावी खासदार प्रशांत जगताप,' असा उल्लेख करण्यात आला होता. या फलकामुळे राष्ट्रवादीसह काँग्रेस-भाजपमधील अनेकांच्या भुवया उंचावल्या आहेत.

प्रशांतच्या मनात काय ?

अजित पवार म्हणाले, "प्रशांत जगताप यांना खासदार होण्यासाठी माझ्या मनापासून शुभेच्छा. पुणे लोकसभेचा उमेदवार घटक पक्ष एकत्र बसून ठरवू. मात्र, नवा चेहरा दिल्यास जनताही त्याला पसंत करते. प्रशांतच्या मनात काय आहे, हे आधी जाणून घेतो. मग माझ्या मनातले सांगतो. प्रशांत माझा कार्यकर्ता आहे. राष्ट्रवादीने त्याला आजवर विविध पदे दिली आहेत,"

"पुणे जिल्ह्यात पुणे, मावळ, शिरूर, बारामती असे चार लोकसभा मतदारसंघ आहेत. यापैकी कोणत्या लोकसभा मतदारसंघात की राज्यसभा खासदार म्हणून प्रशांत इच्छुक आहे ठाऊक नाही," असेही ते म्हणाले.

मी निवडणूक अधिकारी नाही...

निवडणुका कधी होणार, असे पत्रकारांनी विचारले असता ते म्हणाले, "मी निवडणूक अधिकारी नाही. जेव्हा निवडणूक अधिकारी होईन तेव्हा मी नक्की सांगेन की निवडणुका कधी होतील. फेब्रुवारी २०२२ मध्ये निवडणुका होणार होत्या. त्यावेळी अनेक इच्छूकांनी तयारी केली. देव दर्शन केले. निवडणुका काही झाल्या नाहीत. आता सर्व इच्छूक कंटाळले आहेत,"