Sambhaji Bhide on Ashok Kharat : खरात प्रकरणावर संभाजी भिडेंची संतप्त प्रतिक्रिया : दोन वाक्याताच मुळापासून विषय संपवण्याचा सल्ला

Pune News, 26 Mar : संपूर्ण राज्यभरात सध्या भोंदूबाबा अशोक खरातच्या कारनाम्यांची चर्चा जोरात सुरू आहे. त्याने केलेले काळे धंदे आणि त्याबाबतचे नवनवीन व्हिडिओ समोर आल्याने राज्यात खळबळ उडाली आहे. खरातने अनेक महिलांचं लैंगिक शोषण केल्याचं आणि त्यांना फसवल्याचं समोर येत आहे.

शिवाय अनेक पीडित महिला आता समोर येऊन त्याच्याविरोधात तक्रार करत आहेत. अशोक खरात प्रकरणावरून राज्यातील राजकारण देखील मोठा भूकंप आला आहे. अशातच आता या सर्व प्रकरणावर श्री शिवप्रतिष्ठानचे संस्थांपक संभाजी भिडे गुरुजी यांनी देखील प्रतिक्रिया दिली आहे.

पत्रकारांनी खरात प्रकरणी प्रश्न विचारला असता संभाजी भिडे यांनी संतापून, "ती काय बोलण्याच्या लायकीची माणसं आहेत काय? अशोक खरातला मारून टाकून मोकळं व्हावं, खरात प्रकरणावर चर्चा सुद्धा करू नये", असं वक्तव्य केलं आहे. त्यामुळे नाशिक प्रकणावरून भिडे गुरूजी चांगलेच संतप्त झाल्याचं पाहायला मिळालं.

दरम्यान, भोंदू अशोक खरात प्रकरणाचा तपास एसआयटीच्या माध्यमातून होणार आहे. नाशिक पोलिसांकडे आतापर्यंत खरात विरोधात ८ गुन्हे दाखल करण्यात आले आहेत. तर वावी आणि सिन्नर पोलिसांकडील प्रत्येकी एक अशा १० गुन्हांचा एसआयटी तपास करणार आहे.

त्यामुळे खरातच्या अडचणीत मोठी वाढ झाल्याचं पाहायला मिळत आहे. तर दुसरीकडे खरातशी संबंधित अनेक मालमत्ता समोर येत आहेत. ज्यामध्ये प्रशासकीय अधिकाऱ्यांचे संबंध असल्याचं उघड होत आहे. त्यामुळे खरातशी संबंधित राजकीय नेते आणि अधिकाऱ्यांचे धाबे दणाणले आहेत.