Chandrakant Patil : चंद्रकांत पाटील संतापले; म्हणाले, 'हे खपवून घेणार नाही, राजकीय दबावाला बळी पडू नका'

Pune News : कोथरूड विधानसभा मतदारसंघातील होणाऱ्या अनियमित पाणीपुरवठ्याबाबत राज्याचे उच्च व तंत्रशिक्षण आमदार चंद्रकांत पाटील चांगलेच संतप्त झाल्याचे पाहायला मिळाले. कोणत्याही राजकीय दबावाला बळी न पडता, नियमीत पाणीपुरवठा करावा, अशा सक्त सूचना त्यांनी यावेळी पाणीपुरवठा करणाऱ्या अधिकाऱ्यांना दिल्या आहेत.

कोथरुड विधानसभा मतदारसंघातील पाणीपुरवठ्यासंदर्भात महापालिकेचे पाणी पुरवठा अधिकारी, व्हॉलमन आणि नागरीक अशी संयुक्त बैठक कोथरूडमधील अंबर हॉल येथे झाली. यावेळी चंद्रकांत पाटील (Chandrakant Patil) यांनी कोथरूडमधील विविध भागातील पाणी पुरवठ्याबाबतच्या अडचणी जाणून घेतल्या. यावेळी उपस्थित माजी नगरसेवकांनी अनियमित पाणी पुरवठ्याबाबतच्या तक्रारींचा पाढा वाचला. गेल्या काही वर्षांपासून महापालिका वेगवेगळ्या भागात दर गुरुवारी पाणीपुरवठा बंद असल्याचे जाहीर करते. मात्र, त्यानंतर पुढील दोन-चार दिवस पाणीपुरवठा सुरळीत होत नाही.

त्यासोबतच बालेवाडी गावठाणमध्ये काही ठिकाणी दहा-दहा दिवस पाणीपुरवठा होत नाही. तर एसएनडीटी येथील समान पाणीपुरवठा योजनेतंर्गत पाण्याची टाकी उभारली असली, तरी ते काम निकृष्ट झाले असून, टाकी सुरु होण्यापूर्वीच गळती लागल्याचे निदर्शनास आणून दिले. त्यासोबतच अनेक भागात पाणीपुरवठा करणारे कर्मचारी कामात कुचराई करत असल्याचे निदर्शनास आणले.

त्यावर पाटील यांनी संतप्त होत अधिकाऱ्यांना खडेबोल सुनावले. पुणे महापालिकेच्या २४×७ योजनेअंतर्गत पहिली पाण्याची टाकी बाणेर बालेवाडीमध्ये कार्यान्वित झाली. त्यानंतर उर्वरित पुण्याला मार्गदर्शक ठरेल, असे याचे कार्यन्वयन सुरू झाले. पाण्याच्या टाक्या बांधण्याचे काम सुरू आहे. समान पाणीपुरवठ्यासाठी प्रत्येक घरात मीटर लावण्याचा निर्णय झाला असून, त्याचेही काम सुरू होईल.

'दुसरीकडे पाणीपुरवठ्याबाबत अनेक तक्रारी वारंवार येत आहेत. या तक्रारीमध्ये अनेक भागात राजकीय दबावामुळे अनियमित पाणीपुरवठा होत असल्याचे समोर येत आहे. त्यामुळे ही बाब खपवून घेतली जाणार नाही. पाणीपुरवठा विभागाचे अधिकारी आणि कर्मचाऱ्यांनी कोणत्याही राजकीय दबावाला बळी पडू नये. पाणी ही अत्यावश्यक बाब असल्याने नागरिकांना त्यापासून वंचित ठेवण्याचा प्रयत्न केल्यास कठोर पावले उचलावी लागतील', अशी संतप्त प्रतिक्रिया व्यक्त केली.