Chandrakant Patil statement: मोदींच्या आईंवर, फडणवीसांच्या बायकोवर बोलतात तेव्हा...; पडळकर यांच्या वक्तव्यावर चंद्रकांत पाटलांनी स्पष्टच सांगितले

Pune News : भाजपचे आमदार पडळकर यांनी जतमध्ये बोलताना राष्ट्रवादी काँग्रेस शरदचंद्र पवार पक्षाचे नेते जयंत पाटील यांच्याबाबत आक्षेपार्ह वक्तव्य केले. याचे तीव्र पडसाद गेल्या दोन दिवसापासून राज्यभर उमटत असून, राज्यातील नेते मंडळीतून याबाबत प्रतिक्रिया देखील येताना पाहायला मिळत आहेत. याबाबत राज्याचे मंत्री चंद्रकांत पाटील यांनी प्रतिक्रिया देत विरोधकांना सुनावले आहे.

पुण्यामध्ये बोलताना चंद्रकांत पाटील (Chandrakant Patil) म्हणाले, राजकारणामध्ये शिवराळ भाषेचा ट्रेंड गेल्या चार-पाच वर्षांमध्ये पडला असल्याचे पाहायला मिळत आहे. शिवराळ भाषा वापरायला लोकांना काही वाटेना झाले आहे. शिवराळ भाषा वापरली म्हणजे आपल्या म्हणायला जोर येतो, असे काहीसे त्यांना वाटतेय का ?असा प्रश्न पडत आहे.

भाजप (Bjp) आमदार गोपीचंद पडळकर यांनी वापरलेला भाषेचे समर्थन मुख्यमंत्री देवेंद्र फडणवीस यांनी केलेले नाही. तसंच मी अथवा भाजपचा इतर कोणताही नेता करणार नाही. मात्र, टाळी एका हाताने वाजत नाही हे देखील खरे आहे. विरोधकांनी पंतप्रधान मोदींवर आणि त्यांच्या आईंवर बोललेले चालते त्यासोबतच देवेंद्र फडणवीस यांच्या पत्नीवर देखील ते बोलतात तेव्हा विरोधकांनी देखील तारतम्य बाळगणं आवश्यक आहे.

या गोष्टीतून पडळकर यांचे मला समर्थन करायचे नाही. मात्र गोपीचंद पडळकर यांबरोबर विरोधकांनीही आपल्या बोलण्यावरती कंट्रोल करणे आवश्यक असल्याचं चंद्रकांत पाटील म्हणाले. गोपीचंद पडळकर यांना अशी भाषा वापरू नये असे सांगण्यात आले असून गोपीचंद पडळकर हे आमचे आज्ञाधारक कार्यकर्ते असून फडणवीसांनी त्यांना सूचना दिल्यानंतर आता त्यांच्या ध्येयबोली आणि भाषेमध्ये फरक पडेल, असे देखील चंद्रकांत पाटील म्हणाले.

त्यामुळे विरोधक आणि सत्ताधारी या दोघांकडूनही तारतम्य बाळगण्याची आवश्यकता असल्याचे चंद्रकांत पाटील यांनी सांगितले.