Pune Congress News : पुण्यातील काँग्रेस नेतेही 'रामभक्ती'वर स्वार; लोकसभा इच्छुकांची 'रामरक्षा'?

Pune News : एकीकडे काँग्रेसच्या वरिष्ठ नेत्यांनी राम मंदिराच्या सोहळ्याला उपस्थित राहण्यास नकार देत, कोणत्याही कार्यक्रमांमध्ये प्रत्यक्ष सहभाग घेणे टाळले आहे. मात्र दुसरीकडे पुण्यात काँग्रेसचे नेते आणि लोकसभेसाठी इच्छुक असलेल्यांनी अयोध्येत राम मंदिर प्राणप्रतिष्ठापणा सोहळ्याच्या निमित्ताने विविध कार्यक्रमांचे आयोजन केल्याचे पाहायला मिळत आहे. (Latest Marathi News)

पुणे शहरात हिंदुत्वाला आणि श्रीरामाला मानणारा मोठा वर्ग आहे. त्यामुळे आगामी लोकसभा निवडणूक जिंकायची तर या वर्गाला नाराज करणे कोणत्याही राजकीय पक्षाच्या उमेदवारासाठी योग्य ठरणार नाही. त्यामुळे राष्ट्रीय पातळीवर जरी राम मंदिराच्या निमित्ताने करण्यात येणारा कार्यक्रमांपासून फारकत घेण्यात येत असली, तरी पुण्यातून लोकसभेसाठी इच्छुक असलेल्या काँग्रेसच्या नेते मात्र राम मंदिराच्या उद्घाटन सोहळ्याच्या निमित्ताने महाआरतीचा आयोजन करताना दिसत आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

काँग्रेसचे आमदार रवींद्र धंगेकर यांनी काही दिवसापूर्वी महाआरतीच्या आयोजन केले होते. आता काँग्रेसचे माजी आमदार मोहन जोशी हे देखील महाआरतीच्या आयोजन करणार आहेत. विशेष म्हणजे दोन्ही नेते लोकसभा निवडणूक काँग्रेसकडून लढवण्यासाठी इच्छुक आहेत. अयोध्येतील श्रीराम मंदिर लोकार्पण सोहळ्यानिमित्त 22 जानेवारीला दुपारी 12 वाजता सदाशिव पेठेतील रहाळकर श्रीराम मंदिरात काँग्रेस कार्यकर्ते महाआरती करणार आहेत, अशी माहिती माजी आमदार आणि प्रदेश काँग्रेसचे उपाध्यक्ष मोहन जोशी यांनी पत्रकाद्वारे दिली आहे.

या महाआरती सोहळ्यात पक्षाचे पदाधिकारी, कार्यकर्ते सहभागी होणार आहेत. सदाशिव पेठेत नागनाथ पाराजवळील रहाळकर श्रीराम मंदिर सुमारे 200 वर्ष जुने असून तिथे पट्टाभिशक्त श्रीरामाची मूर्ती आहे. अशी ऐतिहासिक पार्श्वभूमी असलेल्या श्रीराम मंदिरात महाआरती आयोजित केल्याचे मोहन जोशी यांनी पत्रकात म्हटले आहे. 'श्रीरामाविषयी सर्व भारतीयांच्या मनात श्रद्धा आहे. श्रीराम हे दैवत प्रत्येक भारतीयाचे आहे, कोणा विशिष्ट व्यक्ती अथवा समूहाचे नाही व कोणा पक्षाचे अथवा संघटनेचेही नाही, या दैवताला पक्षीय-राजकीय स्वरूप देण्याचा प्रयत्न कोणी केला, तरी ते भारतीयांना मान्य होणार नाही. प्रभू रामचंद्रांविषयी सर्वांच्या मनात आस्था आहे. आपल्या सहज बोलण्यातही श्रीरामाचे नाव घेतले जाते, हे त्याचेच उदाहरण आहे, असे जोशी म्हणाले.

'अयोध्येतील श्रीराम मंदिर लोकार्पण सोहळा साजरा होत असताना याच श्रद्धायुक्त भावनेने आम्ही प्रभू श्रीरामाची महाआरती करीत आहोत. श्रीरामाचा पक्षीय, राजकीय वापर करणाऱ्यांना रामरायानेच सदबुद्धी द्यावी, अशी आमची प्रार्थना असेल. काँग्रेसचे नेते, पंतप्रधान राजीव गांधी यांच्या हस्ते अयोध्येतील श्रीराम मंदिराचा शिलान्यास झाला आहे, पण त्याचा कधीही राजकीय वापर करण्यात आला नाही, याचेही स्मरण या निमित्ताने होईल, असे मोहन जोशी यांनी पत्रकात म्हटले आहे.

(Edited By - Chetan Zadpe)