Anna Bansode : "मध्यरात्री एक्सप्रेस वेवर घडलं AB फॉर्मचं नाट्य..." अजितदादांनी रंगवून सांगितला अण्णा बनसोडेंच्या आमदारकीचा किस्सा

Anna Bansode : पिंपरीचे राष्ट्रवादी काँग्रेसचे आमदार अण्णा बनसोडे यांची विधानसभेच्या उपाध्यक्षपदी निवड झाली. या निवडीनंतर मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार आणि विरोधी पक्षातील आमदारांनी त्यांचे अभिनंदन केले. याच अभिनंदनाच्या भाषणात बोलताना अजित पवार यांनी अण्णा बनसोडे यांचा 2019 मधील निवडणुकीचा किस्सा सांगितला.

मध्यरात्री अडीचला ए. बी. फॉर्म दिला : अजित पवार

अजित पवार म्हणाले, आपला कामाचा माणूस ही टॅगलाईन घेऊन अण्णांनी कामाला सुरुवात केली. प्रत्येक घरापर्यंत ते पोहचले. पण 2014 मध्ये अण्णांचा 2 हजार मतांनी पराभव झाला. गौतम चाबुकस्वार या आमच्याच एका सहकाऱ्याने त्यांचा पराभव केला. 2019 मध्ये मात्र 17 हजार मतांनी ते विजयी झाले. पण या विजयाचा एक किस्सा मला आठवतो.

2019 च्या विधानसभा निवडणुकीच्या सुरुवातीला पक्षाने अण्णाला तिकीट नाकारले. सुलक्षणा शिलवंत यांना उमेदवारी दिली. मी त्यावेळी गप्प बसलो. प्रांताध्यक्ष जयंत पाटील होते. मी त्यांना म्हंटलं अण्णांचं तिकीट कशाला कापलं, त्यांना द्या राव. ते म्हणाले, दादा सगळंच काही माझ्या संमतीनं होतं नाही. बर म्हंटलं, हरकत नाही.

माझा जिल्हा मोठा असल्याने जयंतरावांनी मला दोन एबी फॉर्म जास्त दिले. रात्री 12 वाजता मुंबईतून निघालो. अण्णाला एक्सप्रेस हायवे जिथे संपतो तिथे दोनला बोलावले. त्याला म्हंटलं हा एबी फॉर्म घे आणि उद्या अकराला पहिला जाऊन राष्ट्रवादीचे तिकीट म्हणून अर्ज भरून टाक. अण्णा म्हंटला आहो ते जाहीर तर शिलवंतला झालं आहे. त्याला म्हंटलं तुला काय करायचं आहे, तु जाऊन फॉर्म भर.

मी गुपचूप त्याच्याकडे फॉर्म दिला आणि तो भरायला लावला. जयंतरावांना म्हंटलं, जरा वेगळं केलंय, तुमची संमती असू द्या. जयंतराव म्हणाले काय केलं असेल ते असू द्या, संमती आहे, पण माझं नाव कुठे सांगू नका. ती सुलक्षणा गेली सव्वा अकराला. ते म्हंटले राष्ट्रवादीचा अर्ज आला आहे, तुझा कसा राष्ट्रवादीचा फॉर्म? अशा पद्धतीने अण्णाला तिकीट दिले. त्या निवडणुकीत ते 17 हजार मतांनी निवडून आले, असा किस्सा अजितदादांनी सांगितला.