Ujjwal Nikam: मोदींच्या राज्यात अखंड भारताचं स्वप्न लवकरच सत्यात उतरणार! खासदार उज्वल निकम यांना विश्वास

Ujjwal Nikam: स्वातंत्र्यदिनाच्या पूर्वसंध्येला भाजपकडून पुण्यात विभाजन विभिषिका दिवस पाळला गेला. यानिमित्त स्वातंत्र्यवीर सावरकर पुतळा सारसबाग येथून पूरम चौकापर्यंत मुकयात्रा काढण्यात आली. या मुख्य यात्रेमध्ये राज्यसभा खासदार उज्वल निकम यांनी सहभाग घेतला. यावेळी त्यांनी अखंड भारताचं स्वप्न मोदींच्या राज्यात लवकरच सत्यात उतरणार असल्याचं विधान केलं. या विधानामुळं खासदार निकम चर्चेत राहिले.

या यात्रेनंतर माध्यमंशी बोलताना उज्वल निकम म्हणाले, "भारताला स्वतंत्र १५ रोजी ऑगस्ट निश्चित भारताला आनंद झाला. त्याबरोबरच १४ ऑगस्ट ही तारीख सर्वसामान्य भारतीयांना कधी विसरता येणार नाही, कारण या दिवशी आमच्या भारतीयांशी काही व्यक्तींनी अतिशय वाईटरित्या व्यवहार केला आहे आणि ही भावना आज ही आमच्या मनात तेवत आहे.

आम्हाला जे स्वातंत्र्य मिळालं ते थोर स्वातंत्र सैनिकांच्या आहुतीमुळे मिळालेला आहे, हे आम्ही विसरू शकत नाही. यामध्ये वीर सावरकर यांच्यासह असे अनेक थोर सेनानी होऊन गेले. परंतु आम्हाला खात्री आहे की, भारत पुन्हा एकदा अखंड होईल. जो भारत आपल्यापासून 14 ऑगस्टला दूर गेला तो पूर्ण करण्याचं काम आपले पंतप्रधान नरेंद्र मोदी करतील असा मला विश्वास आहे.

सरकारी वकील म्हणून काम करत असताना खासदार हे पद मिळाल्यानं उज्वल निकम हे योग्य रितीने न्याय देऊ शकतील का? असा सवाल विरोधकांकडून उपस्थित करण्यात येत होता. त्यावर बोलताना निकम म्हणाले, सरकारी वकील म्हणजे मी पगारी नोकर नाही. ज्यांच्या कोणाच्या अशा भामक कल्पना आहेत, त्यांना न्यायालयाचे दरवाजे उघडे आहेत, असं निकम यांनी सांगितलं.

या यात्रेमध्ये उज्वल निकम यांच्यासह शहराध्यक्ष धीरज घाटे, महाराष्ट्र प्रदेश सरचिटणीस राजेश पांडे. आमदार हेमंत रासने. पुणे शहर सरचिटणीस पुनीत जोशी, रवींद्र साळेगावकर, विश्वास ननावरे, प्रियांका शेंडगे शिंदे यांच्यासह पदाधिकारी व कार्यकर्ते मोठ्या संख्येने उपस्थित होते.