Beed News : बीडमधील आमदार पत्नीची भेसळयुक्त दूध स्वीकारण्यासाठी दमदाटी : पुण्यातील डेअरी चालकाला फोनवरून धमकावलं

IAS Tukaram Mundhe : राज्यातील दूध भेसळीविरोधात कडक कारवाई सुरु असतानाच एक धक्कादायक माहिती समोर आली आहे. पुणे जिल्ह्यातील एका दूध पावडर तयार करणाऱ्या प्लांट चालकाला भेसळयुक्त दूध स्वीकारण्यासाठी बीडमधील एका आमदाराच्या पत्नीने फोनवरून दमदाटी केल्याची चर्चा दबक्या आवाजात सुरु आहे. संबंधित प्लांट चालकाने सुरुवातीला हे दूध नाकारले होते. मात्र, कथित दबावानंतर ते दूध स्वीकारावे लागले असल्याचे देखील बोलले जात आहे.

अन्न व औषध प्रशासनाचे आयुक्त तुकाराम मुंडे यांनी अन्न भेसळ व दूध भेसळखोरांविरोधात कडक कारवाई सुरु केली आहे. यामुळे अनेक डेअरी आणि दूध पावडर प्लांट चालकांचे धाबे दणाणले आहेत. त्यांनी भेसळयुक्त दूध स्वीकारणार नसल्याची भूमिका घेतली आहे. दुधात रासायनिक घटक किंवा गुणवत्तेत तफावत आढळल्यास ते नाकारले जाईल, असा निर्णय घेण्यात आला आहे. या भूमिकेमुळे दररोजचे 30 ते 35 लाख लिटर दुधाचे संकलन कमी झाल्याची माहिती आहे.

सूत्रांनी दिलेल्या माहितीनुसार, मंचर, आंबेगाव परिसरातील एका दूध पावडर प्लांट चालकाने दुधाचा टँकर दाखल झाल्यानंतर त्याची तपासणी केली. यात संबंधित दूध निकृष्ट दर्जाचे असल्याचे निदर्शनास आल्याने प्लांट चालकाने ते स्वीकारण्यास नकार दिला. पण हा टँकर बीड जिल्ह्यातील एका आमदाराशी संबंधित होता. बीडमध्ये या आमदार महोदयांचे गोठे आहेत. इथला सर्व दूध व्यवसायाचे संचलन त्यांची पत्नी करते.

त्यामुळे भेसळयुक्त दूध घेण्यास नकार दिल्यानंतर या आमदाराच्या पत्नीने प्लांट चालकाला फोन करून दमदाटी केल्याची चर्चा सुरु आहे. या कथित दबावामुळे अखेर संबंधित डेअरीला ते दूध स्वीकारावे लागल्याचे सांगितले जात आहे. एफडीएकडून सुरू असलेला कारवाईचा धडाका पाहता अनेक दुधावर प्रक्रिया करणाऱ्या उद्योगांनी आपल्याकडे येणार दूध हे चांगल्या दर्जाचे असेल याची काळजी घेण्यास सुरुवात केली आहे. मात्र काही वेळा राजकीय दबावापोटी निकृष्ट दर्जाचे दूध स्वीकारावे लागत असल्याचे दिसून येते.