Jaykumar Gore: जयकुमार गोरे खंडणी प्रकरणात मोठी अपडेट! तक्रारदार महिला पुण्यातील निवृत्त IAS अधिकाऱ्याच्या संपर्कात ?

Pune News : भाजपचे नेते आणि ग्रामविकास मंत्री जयकुमार गोरे खंडणी प्रकरणामध्ये गुरुवारी (ता.3 एप्रिल) नवी मोठी अपडेट समोर आली आहे. खंडणीच्या प्रकरणात निवृत्त आयएएस अधिकारी प्रभाकर देशमुख यांच्या पुण्यातील घरी जात तब्बल सातारा पोलिसांनी तीन तास चौकशी केली असल्याचं समोर आलं आहे.

काही दिवसांपूर्वी मंत्री आणि भाजप नेते जयकुमार गोरे (Jaykumar Gore) यांना दोन कोटीची खंडणी मागितल्या प्रकरणी एका महिलेला रंगेहात पकडण्यात आलं होतं. ही महिला माजी आयएस अधिकारी प्रभाकर देशमुख यांच्या संपर्कात असल्याचा पोलिसांना संशय आहे.

त्यामुळे प्रभाकर देशमुख यांच्या चौकशीसाठी सातारा पोलीस त्यांच्या कोरेगाव पार्क येथील घरी आज सकाळी दाखल झाले होते.सकाळपासूनच सातारा पोलीस प्रभाकर देशमुख यांच्या घरी चौकशीसाठी ठाण मांडून होते. मात्र यावेळी प्रभाकर देशमुख हे घरी नसल्याचं समोर आलं आहे.

⁠महिलेनं मंत्री गोरे यांना मागितलेली खंडणी तसेच पत्रकार तुषार खरात प्रकरणात सातारा पोलिसांना प्रभाकर देशमुख यांच्याकडे चौकशी करायची असल्याचं समोर आलं आहे . मात्र, प्रभाकर देशमुख घरी नसल्यानं पोलिसांनी (Police) त्यांच्या कुटुंबाकडे चौकशी केली. तसेच प्रभाकर देशमुख यांच्या ड्रायव्हरला चौकशीसाठी ताब्यात घेऊन पोलीस साताऱ्याकडे रवाना झाले आहेत.

दरम्यान, ⁠मुख्यमंत्री देवेंद्र फडणवीस यांनी सभागृहात जयकुमार गोरे यांच्याविरोधात तक्रार करणाऱ्या महिलेच्या संपर्कात प्रभाकर देशमुख होते, असे सांगितले होते. त्या पार्श्वभूमीवर प्रभाकर देशमुख यांची चौकशी करण्यात आल्याचं सांगण्यात येत आहेत. प्रभाकर देशमुख यांच्या चौकशीमध्ये नेमकं काय समोर येणार याकडे सगळ्यांचेच लक्ष लागले आहे.