Ketan Agarwal Case: केतन अग्रवाल हत्याप्रकरणाला नवे वळण! होणारी पत्नी सिया-चेतनचे आधीच झाले होते गुप्त लग्न?

Ketan Agarwal murder mystery update: पुण्यातील लोहगड किल्ल्यावरून व्यावसायिक केतन अग्रवाल यांना दरीत ढकलून हत्या केल्याप्रकरणी तपासात आणखी एक धक्कादायक माहिती समोर आली आहे. या प्रकरणातील मुख्य आरोपी आणि केतनची होणारी बायको सिया गोयल हिचे तिचा कथित प्रियकर चेतन चौधरी याच्याशी आधीच गुप्तपणे लग्न झाल्याचा दावा पुणे पोलिसांनी केला आहे.

तपासादरम्यान सीया-चेतनच्या मोबाईलमधील व्हॉट्सअॅप चॅट, कॉल रेकॉर्ड, लोकेशन डेटा आणि इंटरनेट सर्च हिस्ट्रीची सखोल पडताळणी करण्यात आली. गेल्या सहा ते सात महिन्यांच्या डिजिटल पुराव्यांचा अभ्यास करताना सिया आणि चेतन यांनी सुमारे चार महिन्यांपूर्वी कुटुंबीयांपासून लपून गुपचूप विवाह केल्याचे समोर आल्याचा पोलिसांचा दावा आहे. त्यांच्या मोबाईलमधील चॅटमधून या कथित लग्नाचे धागेदोरे मिळाल्याचेही तपास यंत्रणांनी सांगितले.

पुणे पोलिसांच्या माहितीनुसार, गुप्त विवाहानंतर केतन अग्रवाल याला कायमचा दूर करण्याचा कट रचण्यात आला असावा, असा संशय तपास यंत्रणेला आहे. १८ जून रोजी लोहगड किल्ल्यावरून केतन यांना दरीत ढकलून त्यांची हत्या करण्यात आल्याचा आरोप सिया गोयल आणि चेतन चौधरी यांच्यावर आहे. या दोघांना अटक करण्यात आली असून सध्या ते न्यायालयीन कोठडीत आहेत.

माझ्यात हे करण्याची हिंमत नाही, तू ये...

तपासात आणखी एक महत्त्वाची बाब समोर आली आहे. पोलिसांच्या दाव्यानुसार, केतन अग्रवाल यांच्या हत्येचा पहिला प्रयत्न १४ जून रोजी करण्यात आला होता. मात्र, ऐनवेळी सिया गोयल हिची हिंमत झाली नाही आणि तो प्रयत्न अयशस्वी ठरला.

यानंतर सियाने चेतन चौधरीला कथितपणे संदेश पाठवत, *"माझ्यात हे करण्याची हिंमत नाही, तू ये... आपण दोघे मिळून त्याला कड्यावरून खाली ढकलू,"* असे म्हटल्याचा दावा तपास अधिकाऱ्यांनी केला आहे. त्यानंतर १८ जून रोजी दोघांनी मिळून हा कट पूर्ण केल्याचा संशय पोलिसांनी व्यक्त केला आहे.