Ajit Pawar : अजितदादांनी खुर्ची राखली; माघार घेऊनही मोहोळांनी दाखवली बार्गेनिंग पॉवर!

Pune News : महाराष्ट्र ऑलिम्पिक असोसिएशनच्या निवडणुकीच्या निमित्ताने महायुतीतील मित्रपक्ष आमने सामने ठाकले होते. एकीकडे उपमुख्यमंत्री अजित पवार तर दुसरीकडे केंद्रीय मंत्री मुरलीधर मोहोळ हे एकमेकाच्या विरोधात निवडणूक मैदानात उतरले होते. मात्र मुख्यमंत्री देवेंद्र फडणवीस यांच्या हस्तक्षेपानंतर आता या निवडणुकीत वेगळाच ट्विस्ट समोर आला आहे.

महाराष्ट्र ऑलिम्पिक संघटनेची (MOA) उद्या रविवार, २ नोव्हेंबर रोजी होणाऱ्या निवडणुकीत अजित पवार आणि मुरलीधर मोहोळ यांच्यात थेट सामना होणार होता. मात्र, शुक्रवारी रात्री झालेल्या महत्त्वपूर्ण बैठकीत दोन्ही गटांच्या वरिष्ठ नेत्यांनी चर्चा केली आणि त्यात मोहोळ यांनी निवडणुकीतून माघार घेण्याचा निर्णय घेतल्याची माहिती सूत्रांनी दिली.

याबाबत शनिवारी (1 नोव्हेंबर) मुख्यमंत्री देवेंद्र फडणवीस यांची भेट मुरलीधर मोहोळ हे घेणार आहेत. फडणवीस यांची भेट झाल्यानंतर याबाबतचा निर्णय जाहीर होऊ शकतो, असे देखील सांगितलं जात आहे.

मुरलीधर मोहोळ यांनी या निवडणुकीमध्ये उडी घेत महाराष्ट्र ऑलिम्पिक संघटनेच्या सचिवांवर भ्रष्टाचाराचे गंभीर आरोप केले होते. सचिवांकडून करण्यात येणाऱ्या गैरप्रकारावर अजित पवार यांनी जर लक्ष घातलं तर आम्हाला ही निवडणूक लढायची नाही, असं देखील मुरलीधर मोहोळ यांनी स्पष्ट केलं होतं.

भाजपा आमदारांनी उपमुख्यमंत्री अजित पवार यांच्या पक्षाच्या असलेल्या क्रीडामंत्रांवर भ्रष्टाचारांना पाठीशी घालण्याचे गंभीर आरोप करत राजीनामाचे देखील मागणी केली होती. त्यानंतर अजित पवार यांनी देखील माध्यमांना प्रतिक्रिया देत मोहोळ यांना चांगलंच खडसावलं होतं. आता या प्रकरणांमध्ये एक मोठा ट्विस्ट आला आहे. मोहोळ हे या निवडणुकीतून माघार घेणार असल्याचे देखील सांगितलं जात आहे.

फडणवीसांसोबत झालेला तडजोडीमध्ये पहिले दोन वर्ष अजित पवार हे अध्यक्ष राहतील तर मुरलीधर मोहोळ हे वरिष्ठ उपाध्यक्ष राहणार आहेत. तसेच दोन वर्षानंतर अध्यक्षपद हे मोहोळ यांच्याकडे देण्यात येणार असल्याचे देखील वाटाघाटी झाल्याचं सांगितलं जात आहे. ज्या सचिवांबद्दल भाजपने आक्षेप घेतला होता त्यांना या गोष्टींपासून दूर ठेवण्यात येणार असल्याचं देखील सांगितलं जात आहे. याबाबतची आज दुपारी याबाबतची घोषणा होण्याची शक्यता आहे.