Malegaon Election Result : अजितदादांची कट्टर विरोधकांसोबत हातमिळवणी; पहिल्याच निवडणुकीत अपक्षांनी दिली जोरदार टक्कर

Maharashtra local body elections : बारामती तालुक्यातील माळेगाव बु. नगरपंचायतीच्या निवडणुकीकडे संपूर्ण राज्याचे लक्ष लागले होते. या निवडणुकीत उपमुख्यमंत्री अजित पवार यांच्या राष्ट्रवादी काँग्रेसने कट्टर विरोधकांसोबत आघाडी करत सर्वांनाच धक्का दिला होता. त्यातच माळेगाव नगरपंचायतीची ही पहिलीच निवडणूक असल्याने सर्वांच्या नजरा निकालाकडे खिळल्या होत्या.

काही महिन्यांपूर्वीच माळेगाव सहकारी साखर कारखान्याची निवडणूक झाली होती. या निवडणुकीत अजित पवारांनी स्वत: उतरत पक्षाला दणदणीत विजय मिळवून दिला होता. त्यांच्यासमोर कट्टर प्रतिस्पर्धी चंद्रकांत तावरे व रंजन तावरे यांचे आव्हान होते. या निवडणुकीनंतर नगरंपचायतीच्या निवडणुकीतही कट्टर विरोधक पुन्हा आमनेसामने असतील अशी चर्चा होती.

अजित पवारांनी मात्र निवडणुकीआधी रंजन तावरे यांच्या जनमत विकास आघाडीसोबत युती केली आणि ही निवडणूक एकहाती जिंकण्यासाठी पहिला डाव टाकला. त्यामध्ये त्यांना यश आले असून या युतीची माळेगावमध्ये सत्ता आली आहे. मात्र, कट्टर विरोधकांना सोबत घेऊनही अजितदादांच्या उमेदवारांना अपक्षांनी जोरदार टक्कर दिल्याचे निकालातून स्पष्ट झाले आहे.

राष्ट्रवादी काँग्रेस पार्टीचे आठ उमेदवार नगरसेवक पदासाठी विजयी झाले आहेत. तर नगराध्यक्षपदाचे सुयोग सातपुते हे 11 हजार मतांनी आघाडी घेऊन विजयी झाले आहेत. जनमत विकास आघाडीचे प्रमुख रंजन तावरे यांच्या वाट्याला आलेल्या पाच जागांपैकी तीन जागा विजयी झाले आहेत. याशिवाय भाजप व राष्ट्रवादी काँग्रेस पुरस्कृत पुरस्कृत एक जागा प्रमोद तावरे यांच्या माध्यमातून विजयी झाले आहे.

निवडणुकीमध्ये अपक्षांनी पाच जागांवर विजय मिळवून आपली ताकद दाखवून दिली आहे. अपक्ष उमेदवारांचे गटनेते दीपक तावरे यांचे हे यश असल्याचे मानले जात आहे. राष्ट्रवादी काँग्रेसच्या विरोधात शरद पवार यांच्या राष्ट्रवादीसह इतर स्थानिक नेत्यांनी एकत्रित येत ताकद लावली होती. अजितदादांचे सर्व जागा जिंकण्याचे मनुसबे त्यांनी उधळून लावले आहेत.