Pune ZP Election : अजितदादांना पुणे जिल्ह्यात उघडपणे नडलेल्या नेत्याचा भाजपप्रवेश ठरला : जिल्हा परिषदेत 'ऑपरेशन लोटस'ला बळ

Pune ZP Election : इंदापूर नगरपालिका निवडणुकीत बंडखोरी केलेले राष्ट्रवादी काँग्रेसचे माजी जिल्हाध्यक्ष प्रदीप गारटकर यांचा भाजपप्रवेशाचा मुहूर्त निश्चित झाला आहे. मागील काही दिवसांपासून ते भाजपच्या वाटेवर असल्याची चर्चा होती, ती आता खरी ठरताना दिसत आहे. या प्रवेशामुळे पुणे जिल्हा परिषदेत भाजपच्या 'ऑपरेशन लोटसला' इंदापूर तालुक्यातून बळ मिळू शकते.

कधीकाळी उपमुख्यमंत्री अजित पवार यांचे निकटवर्तीय अशी प्रदीप गारटकर यांची ओळख होती. पण इंदापूरच्या नगराध्यक्षपदासाठी 'आयात’ उमेदवाराला विरोध दर्शवून त्यांनी राष्ट्रवादी जिल्हाध्यक्षपदाचा राजीनामा दिला. बंडखोरी करत निवडणुकीच्या मैदानात उडी घेतली आणि नगराध्यक्षपदासाठी उमेदवारी दाखल केली.

गारटकर यांच्या पाठिंब्यासाठी भाजप आणि राष्ट्रवादी काँग्रेस (शरदचंद्र पवार) पक्षाचे नेते एकत्र आले. गारटकर, माजी मंत्री, राष्ट्रवादी काँग्रेस शरदचंद्र पवार पक्षाचे नेते हर्षवर्धन पाटील आणि भाजप नेते प्रवीण माने यांनी कृष्णा-भीमा आघाडीच्या माध्यमातून ‘राष्ट्रवादी’पुढे आव्हान निर्माण केले होते. या सगळ्या घडामोडी म्हणजे एकप्रकारे अजित पवार यांनाच आव्हान मानले गेले.

निकालात गारटकर यांचा पराभव झाला. पण त्यानंतर ते लगेचच अजित पवार यांच्याशी जुळवून घेऊन पुन्हा राष्ट्रवादी काँग्रेसमध्ये सक्रिय होतील अशी शक्यता होती. मात्र आता त्यांच्या भाजप प्रवेशाच्या चर्चा सुरु झाल्या. त्यांच्या पक्षप्रवेशाचा मुहूर्त ठरल्याचीही माहिती आहे. आगामी जिल्हा परिषद निवडणूक डोळ्यासमोर ठेवून महापालिका निवडणुकीनंतर त्यांचा भाजप प्रवेश होणार असल्याचे सांगितले जाते.

अजितदादांकडून 3 जिल्हाध्यक्षांची नियुक्ती :

नुकतीच अजित पवार पुणे ग्रामीणसाठी 3 जिल्हाध्यक्षांची नियुक्ती केली आहे. बारामती, इंदापूर, पुरंदर आणि दौंड यासाठी संभाजी होळकर यांची जिल्हाध्यक्ष म्हणून नियुक्ती केली आहे. भोर, मुळशी आणि मावळ यासाठी विठ्ठल शिंदे आणि शिरूर, जुन्नर, खेड, आंबेगाव या भागाचे जिल्हाध्यक्ष म्हणून राजेंद्र कोरेकर यांच्यावर जबाबदारी सोपवली आहे. याच नियुक्त्यांनंतर गारटकर यांचा राष्ट्रवादीत पुन्हा प्रवेश होणार नसल्याचे निश्चित झाले.