Jayant Patil News: "फौजदाराचा हवालदार झाला; या वाक्यामुळे जयंत पाटील ईडीच्या रडारवर"

पिंपरी : राष्ट्रवादी काँग्रेसचे प्रदेशाध्यक्ष जयंत पाटील यांची अंमलबजावणी संचालनालय तथा ईडीने आज चौकशी केली. त्या निषेधार्थ पिंपरी-चिंचवड युवक राष्ट्रवादीने निषेध आंदोलन केले. उपमुख्यमंत्री देवेंद्र फडणवीस यांना उद्देशून जयंत पाटील यांनी उच्चारलेले 'फौजदाराचा हवालदार झाला' हे वाक्य जिव्हारी लागल्यामुळे ही चौकशी लागल्याचा आरोप यावेळी करण्यात आला.

भाजप नेत्यांनी राजकीय सूडबुद्धीने जयंत पाटील यांच्यासारख्या स्वच्छ चारित्र्याच्या नेत्याला त्रास देऊन नाहक बदनाम करण्याचा प्रकार ईडीची पीडा मागे लावून चालवला आहे, असा आरोप पिंपरी चिंचवड राष्ट्रवादी युवक काँग्रेसचे शहराध्यक्ष इम्रान शेख यांनी यावेळी केला. हे प्रकार थांबले नाहीत तर भाजप नेत्यांच्या घरासमोर आंदोलन करण्यात येतील, असा इशारा त्यांनी दिला.

याप्रसंगी सादर करण्यात आलेल्या 'भाजप वॉशिंग मशीन आणि ईडी वॉशिंग पावडर' या प्रात्यक्षिकातून भाजप ही विरोधकांना नामोहरम करण्यासाठी ईडीचा कशाप्रकारे वापर करत आहे, ते दाखवण्यात आले.

गेल्या 9 वर्षात भाजपच्या एकाही आमदार, खासदारांना ईडीची नोटीस आली नाही, याकडे शेख यांनी लक्ष वेधले. त्याचवेळी महाविकास आघाडीच्या सर्व प्रमुख नेत्यांना जाणीवपूर्वक सरकारी यंत्रणेच्या माध्यमातून त्रास देण्याचे काम हे फॅसिस्ट केंद्र सरकार करीत आहे. त्यांच्या या लोकशाहीविरोधी कारभारास जनता मतदानातून योग्य उत्तर देईल, असे ते म्हणाले.

हे प्रकार थांबले नाहीत तर भाजपच्या नेत्यांच्या घरासमोर आंदोलन करण्यात येतील", असा इशाराही त्यांनी दिला. "ईडी भाजपचा घरगडी" "भाजप हमसे डरती है, ईडी को आगे करती है", "भाजपचा हवालदार काय करतो ईडीच्या नोटीस वाटत फिरतो" "ईडी सरकार हाय हाय", अशी जोरदार घोषणाबाजी या आंदोलनात करण्यात आली. देवेंद्र तायडे, राजन नायर, तानाजी खाडे, युवराज पवार, मीरा कदम, राजेंद्रसिंग वालिया आदी पदाधिकाऱ्यांचीही भाषणे झाली.

(Edited By : Ganesh Thombare