आत्महत्या नव्हे; ही तर सरकारी कारभारातून झालेली हत्याच

पुणे : एसटीच्या चालकाने केलेली आत्महत्या हे या सरकारचे मोठे अपयश असून ही आत्महत्या नव्हे तर सरकारी कारभारातून झालेली हत्या आहे, अशी टीका भारतीय जनता पार्टीचे प्रदेशाध्यक्ष चंद्रकांत पाटील यांनी केली आहे.

नगरमधील एका एसटी चालकांने आत्महत्या केल्याची बातमी प्रसिद्ध झाली आहे. पाटील यांनी या संदर्भात ट्विट केले आहे. यामध्ये पाटील म्हणतात, ‘‘ कालच औसा येथे एसटी कर्मचाऱ्यांशी बोलताना त्यांच्या व्यथा ऐकून उद्विग्न झालो होतो. आज चालकाने एसटीतच आत्महत्या केल्याची मातमी आली.शेतकऱ्यांने शेतात केलेल्या आत्महत्ये इतकच हे भीषण आहे. हा आक्रोष महाविकास आघाडी सरकारच्या कानी जात नाही ? आत्महत्या नव्हे;ही तर सरकारी कारभारातून झालेली हत्याच.’’

गेल्या दोन वर्षात अपुरे वेतन, वेतनातील अनियमितता, कंत्राटी पद्धत या कारणांना कंटाळून तब्बल २८ एसटी कामगारांनी आत्महत्या केल्याचे सांगण्यात येत आहे. कोरोनाच्य गेल्या दीड वर्षात एसटी कर्मचाऱ्यांचे भयंकर हाल झाले. इतर कर्मचाऱ्यांच्या तुलनेत एसटी कर्मचाऱ्यांचे वेतन व भत्ते कमी आहेत. गेल्या चाळीस वर्षात कर्मचाऱ्यांची अनेक आंदोलने झाली. मात्र, त्यातून ठोस आणि कायमस्वरूपी असे त्यांच्या हाती काही पडले नाही. परणामी एसटी कर्मचारी इतर सरकारी कर्मचारी किंवा सरकारी महामंडळाचे कर्मचारी यांच्या तुलनेत सोयी सुविधांपासून दूर राहिले.

गेले काही दिवस एसटी कर्मचाऱ्यांचा संप सुरू होता. दिवाळीच्या तोंडावर सुरू असलेल्या संपातून मार्ग काढण्यासाठी परिवहन मंत्री अनिल परब यांनी सरकारी कर्मचाऱ्यांप्रमाणे महागाई भत्ता देण्याचे मान्य केल्याने बहुतांश संघटनांन संपातून माघार घेतली आहे.ही तात्पुरती उपाययोजना असली तरी कर्मचाऱ्यांसाठी कायमस्वरूपी ठोस उपायांची गरज आहे.

Edited By : Umesh Ghongade