PCMC Mayor News: महापौरपदाची लॉटरी फुटली! लांडगे-अजितदादा वादामुळे गाजलेल्या पिंपरी चिंचवड महापालिकेत कोण होणार महापौर? 'ही' नावं आघाडीवर

Pimpri Chinchwad News: राज्यात 29 महानगरपालिकांच्या निवडणूक निकालानंतर सर्वाधिक जागा जिंकलेल्या पक्षांकडून सत्तास्थापनेसाठी जोरदार हालचाली सुरू झाल्या आहेत. यातच सर्वच राजकीय पक्षांचं लक्ष लागलेल्या महापौरपदाच्या सोडतीचं आरक्षण जाहीर झालं. पण जाहीर झालेल्या आरक्षणामुळे आता अनेक महापालिकांमध्ये सत्तास्थापनेसाठी प्रमुख दावेदार असलेल्या पक्षांना आपला महापौरपदासाठीचा प्लॅन बदलण्याची वेळ आली आहे. अशातच उपमुख्यमंत्री अजित पवार आणि भोसरीचे भाजप आमदार महेश लांडगे यांच्यातील वादामुळे राज्यभरात प्रचंड गाजलेल्या पिंपरी चिंचवड महापालिकेच्या महापौरपदाच्या निवडणुकीत मोठा ट्विस्ट आला आहे.

नुकत्याच पार पडलेल्या पिंपरी चिंचवड महानगरपालिकेच्या निवडणुकीत भाजप विरुद्ध राष्ट्रवादी काँग्रेस अशी थेट लढत झाली. दोन्ही बाजूने पिंपरी चिंचवडच्या महापालिकेची निवडणूक अत्यंत प्रतिष्ठेची करण्यात आली होती. राज्यात महायुतीत एकत्र असतानाही पिंपरी चिंचवडमध्ये अजित पवार आणि भाजपमध्ये कडवा संघर्ष पाहायला मिळाला. पण भाजपनं आपली पूर्ण ताकद लावत राष्ट्रवादीला धोबीपछाड देत सत्ता मिळवली. त्यानंतर महापौर पदाची माळ कुणाच्या गळ्यात पडणार याविषयीच्या चर्चांना उधाण आलं होतं.

पिंपरी चिंचवड महापालिकेत तब्बल 84 जागा जिंकत भाजपनं एकहाती सत्ता काबीज केली आहे. त्यामुळे या महापालिकेत भाजपचाच महापौर होणार हे निश्चित आहे.पण महापौरपदासाठी काही नेत्यांनी आरक्षण सोडत जाहीर होण्यापूर्वीच लॉबिंग सुरू केल्यामुळे मोठी चुरस निर्माण झाली होती. त्यात खुल्या प्रवर्गातील इच्छुकांची संख्या सर्वाधिक आहे. त्यामुळे महापालिकेत एकीकडे सर्वात बलाढ्य पक्ष ठरुनही भाजपसमोर महापौरपदावरुन मोठा पेच निर्माण होण्याची शक्यता आहे.

पिंपरी चिंचवड महापालिकेच्यामहापौरपदाची सोडत निघाली आहे.यात पिंपरी चिंचवड महापालिकेचे महापौरपद हे सर्वसाधारण खुला गट वर्गासाठी आरक्षित झाले आहे.त्यामुळे भाजपच्या 84 विजयी नगरसेवकांपैकी महिला किंवा पुरुष नगरसेवकाला महापौरपद मिळण्याची संधी उपलब्ध होणार आहे. यात महिला नेत्यांपैकी सारिका गायकवाड,सुप्रिया चांदगुडे,स्नेहा कलाटे यांच्या नावांची जोरदार चर्चा आहे. तर पुरुष नेत्यांपैकी भाजपचे शहराध्यक्ष शत्रुघ्न काटे यांच्यासह रवी लांडगेंची नावंही या शर्यतीत आघाडीवर आहे.

पिंपरी चिंचवड महापालिकेत सुप्रिया चांदगुडे या बिनविरोध निवडून आल्या असून एक अभ्यासू महिला नेता, संघटनात्मक बांधणीत हातखंडा म्हणून त्यांची ओळख आहे. तर दुसरीकडे सारिका गायकवाड यांनी 16 हजारांपेक्षा अधिक मताधिक्यानं विजय मिळवला आहे. तसेच उच्चशिक्षित व तरुण महिला चेहरा म्हणून स्नेहा कलाटे याही महापौरपदासाठी चर्चेत आहे.

भाजपकडून शहराध्यक्ष शत्रुघ्न काटे यांना महापौरपदासाठी संधी मिळण्याची शक्यता वर्तवली जात आहे. शंकर जगतापांनंतर शहराध्यक्षपदाची माळ गळ्यात पडल्यानंतर काटेंच्या नेतृत्वात महापालिका निवडणुकीत भाजपनं शहरात दणदणीत यश प्राप्त केलं आहे. त्याचंच बक्षीस म्हणून भाजपकडून काटेंना महापौरपद दिलं जाऊ शकते.

भोसरीचे आमदार महेश लांडगे यांनी निवडणुकीच्या तोंडावर रवी लांडगेंचा भाजपप्रवेश घडवून आणला होता. त्यावेळी भाजपनं रवी लांडगेंना जर काही मोठा शब्द दिला असेल तर त्यांच्याही गळ्यात महापौरपदाची माळ पडू शकते.त्यांनी बिनविरोध निवडून येत आपली ताकद दाखवून दिली आहे. त्यांना पिंपरी चिंचवडच्या राजकारणाचा तगडा अनुभव आहे.