Ajit Pawar: कुठून पुण्याचा पालकमंत्री झालो असं वाटायला लागलंय! सगळा मक्ता मीच घेतला का? अजितदादांचा रोख नेमका कोणाकडे?

Pimpri Chinchwad News:उपमुख्यमंत्री अजित पवार यांचा पुणे दौरा शुक्रवारी सकाळी सहा वाजल्यापासून सुरु झाला, त्याचा समारोप चिंचवडमध्ये सांयकाळी झाला. सकाळी अजितदादांनी चाकण येथे वाहतूक कोंडीच्या मुद्यावरुन पोलीस आयुक्त विनयकुमार चौबे यांच्यावर संताप व्यक्त केला.तर सांयकाळी एका कार्यक्रमात त्यांना कार्यकर्त्यांने त्यांना वृक्षतोड थांबविण्याबाबत सूचना केल्या. त्यावर वैतागून मिश्किलपणे अजितदादांनी त्याला सुनावले.

कुणीही उठतो आणि उपदेश करतो, सगळा मक्ता मीच घेतला आहे. कुठून पुण्याचा पालकमंत्री झालो असे वाटायला लागले आहे, यांनी फक्त सल्ले द्यायचे!केवळ उपदेश करायचा, असे अजित पवार म्हणाले.

पिंपरी-चिंचवडमध्ये मुळा नदीच्या सुशोभीकरण प्रकल्पासाठी झाडे तोडण्यात येत असल्याच्या मुद्द्यावरून अजितदादा चिडले. पर्यावरणप्रेमींनी पालकमंत्री म्हणून अजित पवार यांनी ही वृक्षतोड थांबवावी अशी मागणी केली होती, त्यावर त्यांनी हे विधान केले.

राष्ट्रवादी काँग्रेसचे नेते आणि अभिनेते सयाजी शिंदे यांचा 66 वा वाढदिवस शुक्रवारी पिंपरी-चिंचवडमध्ये अजित पवारांच्या उपस्थितीत साजरा करण्यात आला. यावेळी अजितदादांनी तुफान फटकेबाजी केली. त्यावेळी उपस्थितांमध्ये हास्याचे फवारे उडाले.

सामाजिक कार्यकर्ते मारुती भापकर यांनी यांनी पवना, इंद्रायणी,मुळा नद्यांच्या सुशोभीकरण प्रकल्पांत हजारो झाडे तोडण्यात येत असल्याकडे अजित पवार यांचे लक्ष वेधले आणि पालकमंत्री म्हणून ही वृक्षतोड थांबवण्याची विनंती केली. त्यावर अजितदादांनी त्यांना टोला लगावत उत्तर दिले. भापकर यांनी नदीकाठच्या आणि दुर्गा देवी टेकडीवरील वृक्षतोडीबाबत प्रश्न उपस्थित केला होता.

अजित पवार यांनी सयाजी शिंदे यांच्या वृक्षारोपण कार्याचं कौतुक केले. ते म्हणाले "आमचा संकल्प आहे दरवर्षी 25 कोटी झाडं लावण्याचा आणि सत्ताकाळात 100 कोटी झाडं लावून जतन करण्याचा. यामुळे पुढील 20 वर्षांत निसर्ग संवर्धनात यश मिळेल." "सयाजी आणि माझ्यात साधर्म्य आहे. स्पष्टवक्तेपणा आणि अस्सलपणा आम्हाला जोडतो," असं सांगत अजितदादांनी त्यांचे कौतुक केलं.